|
ردٍ على قصيدة الشآعر ابن نيف
السلآم عليكم ورحمة الله وبركآته
/
\
هذه قصيده للشآعر / قاعد سعد بن نيف الديحاني
موجهه لذوي سويلم
[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
ياللي تبا المسيار يالجار يالضيف = فل الحجاج إن عمستك الصلافه
على الشحم والكيف واحلا السواليف = اللي بها بعض القصص والطرافه
اللي منقَّاتن من الكذب والزيف = هي العلوم اللي عليها الحسافه
عند الرجال اهل الوفا والمعاريف = ذوي سويلم طيبين الضيافه
تجي سوالفهم على غاية الكيف = ما شوهتها الفبركه والكلافه
فديتهم بمصفف الهرج تصفيف = اللي يجيب الطهبله والخرافه
تحدني عنهم اضروف وصواديف = ولا المسافه ماحدتني مسافه
أصبح فراغ الوقت عندي تخاطيف = وقتي غدا حفاف شغلي كفافه
يزيدني مجلس هل الطيب تشريف = هذي حقيقة خاطري واعترافه
والمجلس اللي مابصدره عواريف = وصدورهم فيها النقا والنظافه
ماني على وصله كثير التحاسيف = ولا ظنتي فيه الحيا والمخافه
ألقا عن اهل الناقصات المحاريف = للتافهين أترك علومٍ توافه
من لا يورَّا بعض الاحيان ويعيف = يشرب قراطيع الردى ما يعافه
للرجل من نبع الشكاله مغاريف = ولا الردى نقعٍ مصيره جفافه
وكلن على طبعه يدور مواليف = من ساق شوفه يم شرواه شافه
تم الكلام ولا يبيلي مظاريف = نشرتها مثل الخبر فالصحافه
حب ووفا ماهي دعاية وتعريف = اِنقاد لاهل الطيب حرفي وقافه[/poem]
/
\
وهذا ردي على الشآعر / قاعد بن سعد بن نيف
[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
رسالة فيها تضيع التواصيف = مضمونها أغلى من بنوك الصرافه
من شافها ينسى الهموم المراديف = تقول مكتوبه بليلة زفافه
من شاعر في بدع الألحان حريف = ان ما مشت له طوع جت له عسافه
تقول شعر هلال والخس وحنيف = وصحن و إبن مبرد وشعر العرافه
ومفرح الضمني والألفين وخليف = وضيدان والعواي واهل الثقافه
ما ياخذون الشعر رفده وتسليف = ولا هم بشعار على الشعر آفه
يابن سعد ياريف ركب مناكيف = ياعيدهم عقب التعب والكسافه
ليا زرتنا تشريف من غير تكليف = الف هلا بالصدق ماهي زهافه
حنا وشيخ مايحسب المصاريف = ماحط لضيوفه صحون الكنافه
دايم على ضيفه وجاره كما الريف = ويقابل اللافي بلين ولطافه
ولاهو غريب الطيب من نجل ابن نيف = خليفة الطيب ونعم الخلافه
شوف العذارى يلعبن الغطاريف = لفعولنا وفعولكم بالكيافه
أهل الأصايل والبكار المشاعيف = هذيك مكسوبه وهذي حيافه
نطاحة الجمع المعادي ليا خيف = وجاء للفشق والملح مثل الطخافه
واهل الصحن والنجر والخيل والسيف = اهل المضيف اللي وساع رفافه
واليوم والله ماعلينا تخاليف = مادام عبد الله علينا لحافه
هو ظلنا عن واهج الحر والصيف = للعرب والإسلام عنده مرافه
وصلو على المختار ماذعذع الهيف = وما طاف بالكعبه وكمل طوافه[/poem]
وسلامتكم
تراحيب بن سويلم
يالله إجعل مماتي في صـلاه = بين سجده وتسبيح وركوع
وإجعل آخر كلامي فالحياه = لفظ قول الشهاده في خشوع
واعف عني ليا جات الوفاه= يوم مافيه للدنيا رجوع
ومن جهنم طلبناك النجاه = فزعتك يوم ماعندي فزوع
|