بسم الله الرحمن الرحيم

السلام عليكم ورحمة الله وبركاته



كثروا شواعير الشعـر يامريزيـق
كل يقـول الشعـر عنـدي فنونـه


لاصار مسرح للقصايـد وتصفيـق
للشاعـر اللـي خيـب الله ظنونـه


يقول انا شاعـر قبيلـة وعشيـق
عشيـق خـل مقفيـات ظعـونـه


وسوى دعايه في المجله وتعليـق
وفي كل مجلس شلتـه يمدوحونـه


الزندقه يطـرب لهـا كـل زنديـق
والوعل ابوقرنيـن طالـت قرونـه


هو ما درى ان الشعر فن وطواريق
ولا كل شاعر يمتثل فـي لحونـه


الشعر حبك وسبك ماهو خثاريـق
يامبتلـيـن الشـعـر لاتبتلـونـه


الشعر سره في حكيـم الصناديـق
نبض القلوب وشي مـا تدركونـه


وان ما حصل معنى يويق الشواهيق
معنـى تسيـس للمعالـي ركونـه


يصير باق الهرج هـذر وتلافيـق
سلعة ضعيف ولا مدحنـا زبونـه


الشعـر فكـاك القفـول المغاليـق
عند الرجال وعند منهـو ييصونـه


ياليت له قاضي ولجنـه وتحقيـق
حتى نخلص مـن غريمـه ديونـه


قد قالها قبلـي عشيـر المطاليـق
ياليـت راع المحدثـه تجلـدونـه


بالله يأهل الشعر واهـل المواثيـق
الشعر عزه فـوق نايـف متونـه


صونوه عن قول العياه المطافيـق
الشعـر تـال الوقـت لايبلشونـه




سلامتكم

كل عام وانتم بخير