ياقلب ماكل الهقاوي بعيده
ولاكل راي ٍ لاسمعته يقديك
البارحه ماني على ماتريده
صحيت واليا قلت لي وش مصحيك !!
قلبك حجر وشلون ينبض وريده ؟
واصبحت تتعالى على اللي معليك
من ابكر الافكار اجيب الشريده
واتعب واطرزها بالابداع واهديك
وتجي وتقراها قراية جريده
ماكنها تعبير من قلبي اليك
اشرح عدم رضاي عنك بقصيده
وانته ماتفرق معك دام انها فيك
حزينه ابيات القصيد او سعيده
ماهو بهمك همك اجيب طاريك
دامك كذا عندي قصيده جديده
غزل ولافيها ولابيت يعنيك
واوعدك احاسيسك ماتصبح بليده
ابداعي بوصفي لغيرك بيحييك
وان جيت تبغى اللي مضى تستعيده
وحسبتني من شلة : ( اضحك لي اجيك )
شرعت بيبان الفكر والقصيده
واليوم صرت اصك عنك الشبابيك