عايض النفيعي

آسف على ما بدر منّي .. وسويته
أشره وشرهتك ياعيني على راسي


أخطيت .. بس الطريق الصّح مأخطيته
أقر .. وإقرار نفسي بالخطـا قاسي


حتى وأنا الشاعر اللي وازن ٍ بيته
أزريت لأوزن ولا اضبط معك مقياسي


وقفت فالموقف اللي ما تمنّيته
يا شين ميقافي .. ويا شين مجلاسي


كحلت عين الزعل بالكحل وأعميته
وعيونه منفصّه .. ما هيب نعّاسي


لحظة غضب والغضب ملعون توقيته
اينسّي الذاكره .. ويذكّر النـاسي


حقّك عليّه .. وحدّي ما تعدّيته
لا يا بعد روحي .. ولا يا بعد ناسي


لو منت غالي عليك العذر مأبديته
والعذر لو زاد قدري ، ما نقص باسي


إن كاني أغليك وأشعورك ما داريته
وش خانة أغليك .. قل وش خانة إحساسي

( تــنــاقيــــــــع )







..