العمر رحلة عمل وابليس قاطع طريق
والهم حمل ٍ لياشاله جمل برّكه
واللي مايبرك لو انه شال مالا يطيق
يثبت بالايمان لو ثقل الحمول انهكه
مانيب متصعلك ولو شفت دربي يضيق
لو ان رزقي مايحصل غير بالصعلكه
رزقك لك ولو كثر حوله يدين وزعيق
اسعى وربك كريم اليارميت اشبكه
حاول تصيد سمكه وارم الشبك في العميق
وان صدت حوت اشكر الله كنت تبغى سمكه
لو آكل العيش بلحاله بوجه ٍ طليق
ولاملِك باع ما وجهه ثمن مملكه
لاتحتقر شي شف هرمز لو انه مضيق
حربيّا ً اول حلول ايران للمعركه
وطويق لو صغّروا باسمه وسمّي طويق
اللي يشوف ان في راسه سِطر يسلكه
ياصاحبي ماني مدقّق لو اني دقيق
وجوابي اليا اسألوا نشمي وفيه بركه
البير ناظر به من ابعيد واحذر تويق
وان وقت به لاتغوص بماه وتحرّكه
وانا كما البير لابانت عيوب الرفيق
صامت لو الصمت بيأدي الى التهلكه
قالوا لي بهالزمن ماعاد تلقى صديق
صديقك المال يافي قد ماتمسكه
واقول يالله لاتحوجني لاخوي الشقيق
وشلون عاد الصديق وكثر مايملكه
العمر رحلة عمل وابليس قاطع طريق
وايمانك اسلاح جيش ابليس مايربكه
|