قصيده ترحيبيه بمناسبه حفل تكريم الشيخ متعب بن ذعار القبع الذي اقامه الوالد / سبيع بن مطر بإسم وفعل أهالي الحشيف الاسبوع الماضي والذي حضره عدد من أعيان قبيلة عتيبه ومنهم
الشيخ / بدر بن محماس الشغار
الشيخ / فيحان الشغار
الشيخ/ برجس بن علوش ابن محيا
الشيخ/غزاي بن بنيدر بن حليمه
الشيخ/تراحيب بن سحاب المغيري
واعتذر لمن لم يحضرني اسمه من وجهاء القبيله هذه اللحظه
[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
يامرحبا ترحيبة الارض بالسيل=لاجا الحيا عقب السنين الطويله
لاهل وبله من صدوق المخاييل=ونبت به النوار عقب المخيله
ترحيبة من ثقلها مالها كيل=بيضً ملامحها عريضه ثقيله
جمالها ماهوب محتاج تجميل=الله مصورها بصوره جميله
ازكى من الازهار واعذب من النيل=باللي لفونا من كبار القبيله
بعتيبه الهيلا الدهاه الحلاحيل=حي الفروع من الاصول الاصيله
اهل الشرف والجاه والسيف والخيل=واهل الحصون الشامخات الظليله
واهل الشجاعه شاربين الفناجيل=ومطوعين الصعب باهون وسيله
لطامة العايل وذباحة الحيل=عشاقة الطالات والمستحيله
على الشحم والعود والبن والهيل=في ليلة ماهيب بايات ليله
مكمله بحضوركم خير تكميل=والطيب لاهل الطيب مقبل بحيله
في حلة رجالٍ وباسما رياجيل=الاد عاصي كاسبين الفضيله
من غير قاصر فالنشاما وتقليل=كل معه فعل له وينتمي له
حنا خوان المجد جيل بعد جيل=نفس الملامح والشكل والفصيله
تاريخنا مثبوت جمله وتفصيل=ما أحد ولو حاول يزيله يزيله
مافيه زور ولادخل فيه تعديل=برق يلوح وكل عين تخيله
لنا بصفحاته فعول ومداهيل=وبأيماننا وجه الصحيح ودليله
مصادرً تنور سوات القناديل=عله وطب للقلوب العليله
عزً لمن حالت عليه الحلاحيل=ريف الفقارا بالليال البخيله
رفيقنا يلقى كرامه وتجليل=وإن زاد حمله كلنا نرتكي له
مايشكي من الضيم والجور والميل=مادامنا حيين والله وكيله
وعدونا لو كال ندبل له الكيل=قبل يجينا في محله نجيله
نسقيه فنجال مقند من الويل=وان عاند من الارض كله نشيله
وقت مضى في ساعة الحط والشيل=لاناش خشم الزند خشم الفتيله
غاراتنا دايم كبار المحاصيل=وافعالنا دايم عظام وجليله
واليوم حكم آل السعود المشاكيل=اللي حموها بالسيوف الصقيله
حكم بشرع الله طرد ظلمة الليل=حكم عسى ربي علينا يطيله
تم الكلام وخير من كل ماقيل=صلى الله وسلم على اخر نبي له
والله يحييكم على البن والهيل=والعود الازرق والشحم ياقبيله[/poem]
|