[align=center]تواصلاً مع الحبايب
..
أردتها توقيعاً .. وأتت هكذا !!
..[/align]

[poem=font="simplified arabic,4,darkblue,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
ياقلب لبّ الدعوة اللي جتك من فرع الغمام = وإستاذني يانفس من شهوات وقتك واسرعي !!
وإرمي وراك العزة اللي رزّتك بين الحشام = مادام جيتي للعزيز الفرد ذلّي وإخضعي !!
أعظم شعور يصيبني لاجيت للبيت الحرام = والناس من شتّى البقاع تطوف فيه وتستعي !!
أحدٍ لفا زاير بثوبه .. وأحد يزهاه الحرام = والكلّ ياخذ ماكتب له من نصيبه فالسعي !!
مابين ترتيل الشريم وبين زمزم والمقام = سبحان ربي بينهم خلقة يسرسب مدمعي !!
عندي شذا صوت الشريم أخير من سجع الحمام = اللي تغنّابه قبل .. قيس الهوى والأصمعي !!
اعظم منه .. وأخشع منه .. وأزكى .. عليّه بالحرام = يامدعي بالعكس قلي ويش عندك تدّعي !!
وإليا شربت الماء من اللي حوله العالم حيام = أيقن ضميري بِبْركَتْه .. وزال همّي ووجعي !!
مصداق قول المصطفى .. عليه ودّان السلام = (( زمزم يكافي شاربه ضرّه )) وقوله واقعي !!
واليا نظرت لجرّته .. خليل خلاّق الأنام = كثرت دموعي نوب تجبرني على فقد الوعي !!
عداد ماغرّد على السدرة من القمري وحام = عليه صلى الله وسلم .. صلي وسلم معي !!
هذا شعوري والشعور فوصفه يضيع الكلام = الفكر فيه يحير ولساني يتخدّر موضعي !!
ثلاث تبهج خاطري وأعدّها شفّ ومرام = لكن رابعهنّ هو المقصد وغاية مطمعي !!
رجاي في ربي كبير المعطي البرّ السلام = ربٍّ لك الله مايردّ الراجي المتضرّعي !!
غفرانه .. وظلّه نهار الحشر في كظّ الزحام = يومنّ شمسه ميل من روس العباد الخشّعي !!
يوم الجحيم مسعّره ظلام من فوقه ظلام = وصياح من فيها من العالم يفجّر مسمعي !!
ياربّ باعد بيننا .. ممشى قدم مليون عام = واجعل جنان الخلد ياجزل العطايا مرجعي !!
هذا وصلّى الله على المبعوث في مسك الختام = عداد ما آمن به صحابي وإقتدا به تابعي !!!! [/poem]


[align=center]..

دعواتكم للفقير إلى ربّه
..
إحترامي !!![/align]