[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
عزَاه يالصدر الوسيع الشمالي = اليوم فيه الضيق ناصب خيامه
احاول اكتم داخله ما جرالي = بالصبر والحنكة وبالابتسامة
وقتي معقَد حاجبه ما صفالي = اطوي شهوره بالعزم والصَرامة
ما هان وجهي رغم شهب الليالي= عزيز نفس وراس مالي كرامة
لو مال بحموله نشيط الجمالي = ما ملت بحمول الشَرف والشَهامة
دارت دواليب الزمن وانتهالي= رمى على قلبي وصدري سهامه
ذا من يمين وذا يجي من شمالي = يالله لطفك والستر والسلامة
وجدي على الرَاحة ويا وجد حالي = البارحة ليلي وحيشِ ظلامه
ارخى عليَ اسدوله وحاس بالي = يوم الهوا ميَل غصون البشامة
دارت بي الذكرى و حلمي طرالي = حلم الجريح اللي تذكَر غرامه
والحلم مات العام يا همَلالي = قامت على حلو الحلوم القيامة
لي صاحبٍ ما اكذب ليا قلت غالي = حايز على فكري وجلَ اهتمامه
بيني وبينه ظرف الآيام حالي = والظرف ليل البارحة رد عامه
طبع الزمن يقطع حبال الوصالي = ويهزَ حكم العاشقين ونظامه
الله يصبَرني على كل حالي = لا نبَش اجروحي نواح الحمامة
وتبقى عليَه غترتي والعقالي = العقل حكمة // والتهَور غشامة
مدام عز النَفس هو راس مالي = الله ولا تبع الرَدى والرَخامة
اشوم وارزَ العلم فوق عالي= بعيد عن مشقاص وابو دولامة
وارتاح من كثر اللغط والجدالي = ومن اللي إلها باسفل اللحي شامة
خلاص صدري ضاق ما هو شمالي = خطرٍ من الضيقه تكَسر عظامه !!
لا صار مافيها حرام وحلالي = لحدٍ يلَحقني عتاب وملامة
الرَيح ما هزَت كيان الجبالي = اطويق مع دمخ ورواسي تهامة
والله يهَونها ويصلح حوالي = واعيش حتَى الموت مرفوع هامة
[/poem]

هزاع الشيباني