السلام عليكم ورحمة الله وبركاته ,,,





[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]
يانجد احبك واعشقك واتوجّدك= لأجلك ولأجل اللي حلاه معدومي
ماشفت مثله بالحلا في بدايدك = بيّح خفى قلبي لو انّي كتومي
ولو كنت وسطك مير يانجد ما ابعدك!= لاتحسب ان البعد بعد اليمومي
اجيك يامنبع غرامي واعايدك = عيدك مبارك جعل عزّك يدومي
ويانجد تنشدني وانا مثلك انشدك = وانا على خبرك علومي علومي
ماغير اغنّي في بهاك وفرايدك = وافز مع طرياك من حلو نومي
كم من هنوفٍ تزعل ان جيت امجّدك = وياعلّها بعد الزعل ماتقومي
قلبي معك عليه وسمك وشاهدك = ماينمحي يالين تمحى النجومي
تلقى عليه اسمك وتاريخ مولدك = شهادةٍ فيها الغرام مختومي
الله ياوقتٍ مضى لي على يدك != يوم السعد طيره علينا يحومي
واليوم انا يانجد ماغير اجاهدك = واتعبتني وانا قويّ العزومي
تغيرت مع من يحبّك عوايدك = ولاعاد منك الا العنا والهمومي !
مجذاب دلوك عقب شحّت مواردك = مجذاب سرحان الخلا للحومي
يزها ربيعك مير ماني بحاسدك = جيته وعرّضني لهيب السمومي
حالي تغيّر والسبب من تقصدك =وللحزن في وجهي وحالي رسومي
وانا معك في كل حالاتك احمدك = حتى لو اني قانعٍ من لزومي
عيبٍ علي اجحدك وشلون ابجحدك != وانا حياوي واستحي من هدومي !
دامي على صدق المحبّه معاهدك = عهد النقا ماهو بعهد الرخومي[/poem]

وسلامتكم,,,


عمر بن عبدالرحمن