من حطب حزمةً يشتالها, والضعيف
لايسولف سواليفٍ..مهو قدها
ياولد لاسرقت الشمس..وانت الكفيف
مال عينك صباح ونور..لو ودها
ليلك اسود من البارح..ودربك مخيف
توك اللي فرقك الهزل عن جدها
تلتفت للربيع اللي شعاه الخريف
وانت لك دمعةٍ تفضح حيا خدها
والله اللي غدى حلمك سنا برق صيف
لاح لك والأماني فيه يابعدها
امتطيت السراب ورحت حملك خفيف
واصبح الصبح وحمولك على حدها
من برك في مباريك..الردي والسخيف
لايسولف علوم الطيب..ويعدها
لايجي في ثياب ابن الحلال..النظيف
يترك السالفه للي بنى مجدها
خذ عيوني وشف حالك بها يالعفيف
لجل تفخر علومك فيك وتعدها
كان عيبي معك صادق وقصدي شريف
وكان عيبك ضعافه نفسك وحقدها
انت زله وانا زليت..والله لطيف
يسر امر العباد وياخذ بيدها
عزني عنك ربي, دوك راسي منيف
وانت باقي رهين اطبوعك وعبدها
جيت ضيف على قلبي وبتروح ضيف
وان بقى حاجة في داخلك بدها
وكان الاصحاب مثلك جعل مامن وليف
صحبةٍ مثل هذي..لارحم جدها
ومن حطب حزمةً يشتالها والضعيف
لايسولف سواليف مهو قدها
ابوغاده