ليت ذنبي غير فرقاك واستغفر واتوب
كان ماخيّم بصدري من الفرقا نزاع


سقت قلبي من شماله وسيّرته جنوب
كيف اوادع وانت اخذت المودّع والوداع


خافقن يلبس لك العشق والتحنان ثوب
مارضالك بالمهونه ولا جاك بخداع


كل شي غير داعيك ماهو بمحسوب
شمس ماتشرق بوصلك مهى ضى وشعاع


وان حكوا في سيرة ابعاد عميان القلوب
ضمّنى في وسط عينك وخل القاع قاع


وان خذانى فكري النازح الغر اللعوب
ناد باسمى ويتحدّر غروري لك ضياع


وان غفا ليلي بلياك واعياه الهروب
لك معى صوت ومواثيق وهجوسن تشاع


قد غلبتك وانت ماعشت في يوم مغلوب
قل نعم وانا اعترف لك واقول انك شجاع!!


والله انى جنتك وانت راضى ومغصوب
ذبت فعروقك وغيرت بك كل الطباع


سم باسم الله في قلبي وعد الدروب
كيف يتبعثر خفوقي واجي لك بانصياع


وكيف لاخطيت بشعوري وشفت انى كذوب
التزمت الصمت وعيونى حكاية نزاع