السلام عليكم
أتمنى لها القبول ،،


بين نظرات الحقيقه ولحظات الذهول
العقل للرجل (زينه) وأنا عقلي سمه

بعد ماكملت خمس على العشرين حول
شفت هيفا الخصر نجلا النظر فالمحكمه

جيدها أتلع لبسوها القلايد والحجول
وجت تطق إبهامها (بالمعاني) مفعمه

تغري أصحاب المناصب وتضحك بالخبول
وتفتن (العشاق) بالدلعنه !! والسلهمه

ومن عشقها عزتي له يبا يرم الهمول
مانقول الا عسى الله بعفوه يرحمه

مالها صاحب بالأصحاب يومين وتقول
هاك وأخذ السالفه والسوالف مبهمه

يارفيقي هاك (قلبي) تسمع وش يقول
أنت تنشدني وأنا قلبي أزريت أفهمه

فيه دبك خيول مدري مثل قرع الطبول
والروابع مثل خلج على البو(1) مرزمه

من هجوس وسط صدري لها مدة تجول
خلف قضبان (الحنايا) تهمهم همهمه

كل ماقلت أستوا دل زاهيه الدلول
وأنجلت غمامه مزون صيف مركمه

ووردت للعد (هداج) ميراد الذلول
جالها من فوق هداج جضه وأعسمه

صدرت تشرب ظماها وحنتها تهول
وأرجعت تسحب رسنها وجات مدرهمه

مير هاك (أيجاز وإعجاز) ملهمه العقول
كل (كاتب) عن ظميره .. يعلمك قلمه

ياعسى بعض الهقاوي تصبحها الخيول
وتخلي مراح يعاف (الكريم) ويلطمه


وسلامتكم ،،،

البو : جلد الحوار