’
كلمات لإغاني من الزمن الجميل 
عرفها جمهور الشعر والفن وحفظوها عن ظهر قلب ولازالت رغم مرور الكثييير من السنين تحتفظ ببريقها و بشجنها وتأثيرها السحري في الخوافق ..
(1)
البارحه يوم كلن نام ... ما لجلج النوم بعيوني
جيت ولقيت الحرس قدام ... وارجع من الباب مغبوني
اصفق بكفي واعض ابهام ... ابهام يمناي بسنوني
من صابه الحب ما ينلام ... لا صار عاشق ومفتوني
حبه بنا بالضمير خيام ... خلو عشيري وخلوني
ابتبعه والسلام ختام ... لو المخاليق يدروني
كلمات احمد الناصر الشايع
(2)
علّموه إني على عهد الهوى .. باقي ٍ مادام في عمري مدد
ياحبيبي لو يطول بك النوى .. والله ان أصبر على رجوى العهد
حبك اللّي من على القلب التوى .. جيت ابفكّه ولكن انعقد
لو نحل حالي من الحب الخوا .. مالي بغيرك من الغالين أحد
الشباب اللّي من الحسن ارتوى .. ماحد ٍ مثله ملا عيني ابد
خلّك اللّي مالقى لجرحه دوا .. ناظر بوجهه علامات الجهد
إن قوى فرقاك وإلاّ ماقوى .. ماله إلا الصبر في رجوى الوعد
كلمات : السامر
(3)
آرسل سلامي .. مع نسيم الصباح
للصاحب اللي صار وصله صعيب
من قلبي اللي .. صار كلَّـه جـراح
ما عاد ينفع فيه وصـف الطبيـب
وين الليالي .. ويـن هـاك المـزاح
من قبل ماحطَّـوا علينـا رقيـب
حسبي على اللي .. ماسعوا بالصلاح
مايرحمون اللـي صوابـه عطيـب
لا تسألوني .. سرهم ما يباح
في وسط عيني صورته ماتغيـب
كلمات : وحيد
(4)
قولوا للغالي قولوله ... وشهوله يبطي وشهوله
لا جا ولاجا مرسوله ... والحب الله يكفي شره
انا عليل الضماير ... انشد واسوق البشاير
همي زاد وفكري حاير ... فارقني والفرقه مره
امشي وانشد عن مضنوني ... واسهر وانتم ماتدروني
دامي ما شفته بعيوني ... ماترقد عيني منسره
اترك سكه واقضب سكه ... لقيت ابواب ٍ منصكه
جيت الطايف واهل مكه ... قالوا ماشفنا له جره
جيت اهل ابها واهل الوادي ... انشدهم حضر وبوادي
قالوا عود يا النشادي ... ماجا الدواسر والمره
وانشد شمر وانشد علوى ... واهل قطر واهل سلوى
قلت انا مبلي ٍ بلوه ... في زين المبسم والغره
قالولي وشلون اوصافه ... نرسله ناس ٍ عرافه
تجوب بنجد ٍ واطرافه ... تنشد وتلقى مقره
قلت اوصافه يا خلق الله ... كامل والكامل وجه الله
في عيني مامثله والله ... قلت مره بأثر مره
اوصاف الغالي غريبه ... عين وخد وجيد وهيبه
عذبني والله حسيبه ... ياما شكيت المضره
كلمات : فالح
(5)
سلموا لي على اللي سم حالي فراقه
حسبي الله على اللي حال بيني وبينه
وعقب ماهو نديمي صار شوفه اشفاقه
تل عرق الموده واقطعه في يمينه
وقايد الريم تاخذني عليه الشفاقه
ليتني طول عمري دبله في يمينه
ولاذكرت الزمان اللي مضى والصداقه
عود القلب يرجف مثل رجف المكينه
(6)
كلٍ نهار العيد عايد حبيبه
وإلتم شمل اهل القلوب المواليف
وانا حبيبي غايب الله يجيبه
ياحسرتي كان انتهى العيد ما شيف
المستريح اللي حبيبه قريبه
ماهوب مثلي عيشته بالتكاليف
ارب قلبي منه يبري لهيبه
لااشاهده يا ناس يستانس الكيف
جعله نصيبٍ لي وانا من نصيبه
هذا منى قلبي ومن غيره امعيف
(7)
طائرات الميج بزورك حبيبي
في ظلام الليل من بعد العشية
واقف ٍ حيران ودموعي تنثر
ليه يالمضنون ما تسأل عليه
راكز النهدين سوا لي بلاوي
سالب الأرواح أبو عيون ٍ جلية
آه واويلاه واعزي لحالي
من عذاب الحب حصلت الأذية
(8)
أنا البارحة ما أمسيت والمسلمين ارقود
حسبي على من كان هذا من أسبابه
تراني بخيرٍ لين وقّف نعيم العود
ضربني برمحٍ واوسع الحد مضرابه
ألا يا محمد جعل عصر الغضي ما يعود
و ان حل بي أمرٍ فالأسمر من أسبابه
تردى نصيبي والسبب حظي المقرود
ويا لعن أبو حظٍ عجز عنه ما جابه
والله لولا الله أخشى من المنقود
لأشق ثوب الستر ثم أتلوى به
يالله يالمطلوب يا منشي الرعود
ويا موصلٍ حجاج بيته إلى بابه
فّنك تعين اللي تكدر من المنقود
حلالٍ يبيه او يترك الشرك واسبابه
هلكني وغربلني ولا عليه اشهود
جرى الدمع من عيني ولا قلت أنا جابه
أتمنى ان يحوز على رضاكم واعدكم بجزء ثاني قريبا ً 
مرزوق ..