الغالي اللي عيونه تستثير الكلام
عيونه تسولف لقلبي وهي صامته

وشلون لاجيت وارخا عن حلاه اللثام
في ثغره آموت ،، وألا آموت في شامته

محبتي له على ود وغلا واحترام
يرتع بصدري ،، وفي خفاقي إقامته

هذا الغلا اللي على ماقيل حسب النظام
واكيد احبه بعد من شان وسامته

العين عين الوحش ،، والخد زهر الخزام
مع نحل خصره يحير الفكر في قامته

والله مايلحق العاشق بحبه ملام
ولا يفكّر بهرج العالم الشامته .!