[poem=font="Simplified Arabic,6,darkred,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
العمر يفنا وكيد الناس مايفنى = كم واحدٍ عقب موته زادت ذنوبه
من كثر مانسمع ومن كثر ماشفنا = شيٍ يخل اللبيب يضيق به ثوبه
ياكم وياكم تمعننا وصادفنا = اعراض ماتحترم وحقوق مسلوبه
نساير الوقت والموت يتخطفنا = واثر الخطّا والخطايا دوم محسوبه
دايم على المخطيه نسعى ولا اطفنا = ونفوسنا كنها للحق مغصوبه
ومن عقب مطراشنا عن دربه انكفنا = كم واحدٍ راح عمره دون مطلوبه
الموت باعناقنا والوقت ما اسعفنا = وعيوننا عن دروب الحق محجوبه
نخطي وفي كل مره كم تحسفنا = واكتافنا من ذنوب الناس مغلوبه
واللي خلقنا وعشنا . منه ماخفنا = ونجنب العيب لانمشي مع عيوبه
شفنا الهوايل وشفنا غيرها وعفنا = والمسعد اللي تفكر واعلن التوبه
من قبل تطوا الصحف والرمل يلحفنا = والجسم يدفن تحت ووسادته طوبه
ماعاد غير العفو والدين يسعفنا = في ساعة ينكر المحبوب محبوبه
يالله بعفوك ترانا لو تكلفنا = ماغيرك احدٍ سجدنا له ولو نوبه
نرجيك يا ذا العطا تغفر وتنصفنا = ونميز الحق والتوبه هي التوبه
[/poem]