موقف ( 1 ) :
تنتظر وظيفه منذ 4 سنوات وحصلت عليها وقبل توقيع العقد جاء متقدم للوظيفه وقال لك ( تكفففففففى ) انا محتاج وحالتي الماديه تعبانه و ادور وظيفه وبـ الكاد حصلت عليها , لكنهم فضلوك عليّ .. وطلب انك تنسحب عشان يتوظف .. وش بـ تسوي ؟
والله الحقيقة ابي اقول له انا بعد محتاج لي اربع سنين وانا انتظر وانت الله يرزقك وان كثر الكلام اقول يبن الحلال فارقني
موقف ( 2 ) :
تزوج احد اصدقاءك و انت خارج المدينه و أخذت رقم حسابه عشان تحول له ( المعونه ) وفعلاً حولت له 2000 ريال وهي راس المال ..
واكتشفت انك حولتها بالغلط لـ شخص آخر .. وبحثت عن رقمه واتصلت به وشرحت له قصتك وقال لك انا متزوج ومحتاج المعونه .. ها وش تتسوي ؟
والله يامتعب ماني مدورها مادام انه متزوج . قبل اربع سنين تزوج واحد من اخوياي في قصر ليلة عمر في الطائف وكنت احسب القصر ليلة فرح ( كانت عندنا عاده في الطائف له سنيتن انقطعت ماعاد هي موجوده يبدأ الزواج عندنا من الصباح يعني العرب الي ظاهرين حنا نناطحهم داخلين ولا نطلع الا الفجر الثاني عنا الله لايعنينا المهم مالك في طوال العلوم . مريت الماقفه واخذت لي طليين ومريت القصر الغلط قابلوني الرياجيل يالله حيه يالله حيه ودخلوني جوه وجلست على سفرت الفطور الي هم معدينها لهل العانيات والقود الي يجونهم يوم جلست اليا الرياجيل كلامهم ماهو كلام عتبان قلت هذه عرس فلان قالوا لاوالله مير حياك الله , يافلان عود للحوش وظهر طليان الرجال وحطها في موتره قلت علي الحرام ماتعود وتراها عانيتي لكم 
تحالفنا شوي ورحت للماقفه من جديد عقب مادقيت على اهلي وقلت اقروا الكرت وش فيه وعرفت مكان القصر الصحيح .
موقف ( 3 ) :
في احد الاسواق شفت شخص تعرفه .. وسلمت عليه ولا رد عليك .. وأستغربت
وبعد ماطلعت من السوق اتصلت عليه وسألته ليه مايرد السلام ؟
قال لك : اعذرني , اهلي كانوا معي ..
وش تسوي ؟
اقوله تغط معها .
ياخي العالم ذي وش صار فيها . اذا معك زوجتك ولا امك ولا اختك ولا بنتك وش العيب الي يخليك ماترد السلام ولا تسلم على الي تقابله . انا ما اقول اقلبها سوالف وضحك معه بس رد السلام عليه . ترى اهلك ما احد ناط عليهم .
موقف ( 4 ) :
ركب معك واحد لقيته متعطل و أخذته وأخذ معه أغراض من سيارته ( الفارهه ) <- ترى ماهيب قراندي
وأوصلته لـ بيته <- طبعاً قصر ..
ومشيت من عنده وفي نص الطريق لقيت انه ناسي شنطه فيها 500 ألف دولار ..
وش بـ تسوي ؟
لا والله ابي اردها له .
موقف ( 5 ) :
عندك هديه من انسان عزيز عليك ولها 5 سنوات عندك و ناوي تحتفظ بها العمر كله
و أحتجت 5 آلاف .. ممكن تبيع الهديه .. خصوصاً انك ماقدرت توفر الـ 5 آلاف و سعر الهديه يقارب الـ 6 آلاف ؟
ابيعها .
موقف ( 6 ) :
مافي جيبك الا 100 ريال .. وقابلت واحد قال انا جاي من برا الديره ومامعي فلوس الخط ومحتاج لي 100 ريال توصلني لـ ديرتي , تعطيه الـ 100 ولا تعذر منه ؟
ابي اعطيه اياها ورزقي على ربي .