حبيبتي تشبه حكايه في سطرين
مع قلّة احرفها .. غزيرة معاني !

لأجل قراءتها.. في حاجة لـ قلبين
قريتها بواحد قبل .. ما كفاني !

حفظتها ، والدمع ما عاد له عين
وردّدتها لين ازهرت في لساني !

وانا اشبه الإحساس من دون تخمين
في الذاكرة بيتي .. وخلف المحاني !

مزروع في دمعة.. وتلويحة يدين
مقطوف من ضحكة صغير .. وأغاني !

محد قراني مثل ما اقراني الحين
ومحدِ كتبني فـ القديم .. ومحاني !

في صادق الأحرف لحبري .. عناوين
من اللي ضيّعني .. من اللي لقاني ؟!