الرسائل المرسلهـ:
الليل له عاده يامطلق ماتغير من زمان
عيت تفارقني وأنا عجزت كيف أطوفها
يجذب لي الضيقه وأنا .. صدري لضيقاته مكان
تسكن بجوفه كلها .. والهم يسكن جوفها
وآعزتي للي يدور بين خلق الله امان
يبقى ضحيه للحياه المدبره وصدوفها
وقفات بعض الناس تلحقك المذله والهوان
الله ولا فزعة عبادالله .. ولا معروفها
قضى القضا ولسان حال الوقت ماله ترجمان
لو قال كلمه كلمته ماأحدٍ يفك حروفها
مطر العازمي
البريد الوارد:
الله من بعض الرسايل والمواقيف ..إمتحان
جتني على الجرح ونهضت لها ..قبل ماأشوفها
تبقى الحروف الواقعيه .. ملهمة سحر البيان
وأنا أعتبرها.. شرح لأحوال البشر وظروفها
الناس تدري وأنت تدري.. ماعلى الدنيا ظمان
بس الجديد .. الضيق ضاف الناس ضمن ضيوفها
غاب الفرح .. والحزن مستحوذ على بر الأمان
قضى على البسمه وكفنها بطرف نفنوفها
أما البشر لا جيت لك شخص وغدت عشره ثمان:
حطه مع الأموات وإسمه .. سجله بكشوفها
مطلق بن عبيان
|