،
من المملكة ياذبذبه ودي الموجات
مع الجو بارسالك على ديرة اوباما
لـ عبدالله بن محيل غني لنا الأبيات
انا مبطيٍ ماشفته اليال واياما
ولد عمي ونعمين لن راحت ولن جات
رفيق ومحبتنا على الطيب تتناما
ألا ياقصيدي مرحبا وابرك الحزات
لفيت بهجوسٍ فـ المواجيب تتحاما
يوم ان الحقوق يصير معها حجج واثبات
ومن ضيّع حقوقه يغنون له ياما
صدور العرب تغلي من مقابل الغرّات
وعلى حزّة التقدير شفقين واحياما
وراع الوفى والطيب ندمح له الهفوات
لكن التمادي في الخطا يلزم الزاما
وعندك ودونك مابدعته على مافات
عقال البعير وعندك شداد وخطاما
وحنا قرومٍ نجرح ونكسح الشمّات
نجي لك على الميعاد صاحين ونياما
ومن ورّث رجال ٍتشيل العَلَم مامات
ولا في عيون الحاسد المبغض ألاّ ! ما
يجيبون راس العلم من غير هاك وهات
ماعاشوا على طابع يابابا .. ويا ماما
هل الطيب والناموس والجود والفزعات
لهم في قلوب الناس تقدير واكراما ..!
أنا من قبيله ماتجي دونها الهقوات
بطولاتهم ماهي بـ تزييف ودراما
ابا اقابل العاقل واسامح هل الطالات
ولا اصير انا والجاهل اعداء واخصاما
،،
|