نذكر الطيب وننشد على مثله
ونفرح آليا قالوا اتسرك احواله
نحترم شخصه ونغليه ونجله
نذكره من حبنا له ونعناله
وان حصل وتباعدت حله وحله
ماذخرنا الجهد والغايه أوصاله
الكفو نطمع بقربه وناصله
ما طمعنا في مخابيه ورياله
يقطع آلله رفقةٍ مالها مله
عمرها بالمصلحة وثق احباله
ويقطع اللي من قرب منه يمله
ان بخسته عفت قربه ومنزاله
المراجل كايده طبع وجبله
والنعم ما كل رجلن تهياله
دونها عزوم الرجاجيل منتله
بين هجانه ورجلي وخياله
والردي لو جاب دقه على جله
كل ما طال المدى برك اجماله
حي قرم يعقد الراي ويحله
يرتكي للحمل لا كبرة القاله
غاربه ما حط من فوقه يشله
لو تحط طويق في غاربة شاله
ضيغمين سعد منهو عوينٍ له
للمراجل تسبق أفعاله أقواله
فزعت اللي يصتلي مابرد غله
يوم قامت تصرم ظروفه آماله
جزل راس وساس طيبه على حله
مايشح بجاهه وجهه وماله
من نزاهة نفسه ومن حسن دله
مادرت عن مدت يمينه اشماله
مجلسه معلم خطاطيره اتدله
ذا على الداعي وهذا على فاله
بين دهن العود والعود والدله
وبين بشة وجه راعيه واقباله
حاتمين ذبحة الحيل طبعٍ له
عادته لو مايحصل عشاء عياله
يدمح الزله ويكرم من الزله
من دماثة خلقه و من سعت باله
ان لحقك من الزمان وهله خله:
لا تدور غير شرواه ومثاله
|