السلام عليكم ورحمة الله وبركاته
قصيده مشاركه
الله على وقت ٍ مضى يشرح البال
وقت ٍ تنومسنا ليالي سنينه
مافيه حقد ولا سواليف جهّال
تبقى السوالف بالمجالس ثمينه
فيه التواصل بين الاجواد يجتال
تلقى البساطه والعلاقه متينه
اقلوبهم فيها النقى كل الاحوال
مثل الندى فوق الغصن خابرينه
فيهم صفات اقلوب واحلام وامال
اهروجهم بين النشاما سمينه
والهرج له ميزان لاصار ينقال
عند الرجال اهل الوفا وازنينه
والرجل يبقى للخوي ستر واظلال
يفداه من حشمه بقلبه وعينه
واليوم اشوف ان الخلل بيننا طال
والوضع بين الناس يندى جبينه
مما اشوفه عشت انا ضايق البال
صار الزمن مخلوط زينه وشينه
حال ٍ تغيّر فالزمن بين الاجيال
والوقت مايرحم وبيّح كنينه
والحلم يابعده ولاعاد ينطال
مهما يطول الوقت وينك ووينه
الله يرزقنا ويرحم لنا الحال
ويضفي على قلوب البشر بالسكينه
محمد مرزوق السميري