هجوسي ثمان ايام في حالة استنفار
جرت فالضمير وهزت القلب واعماقه
يورالي اعذر فالشعر واطلب المعذار
من البيت واقفي واقفل الباب والطاقه
على كل حال الشعر والحرف والافكار
تدافع ولو مالي على بدعها فاقه
ياقو الكسر لكن تجبرت بالجبار
وراسي على امتانه وقلبي فمعلاقه
انا مومنٍ بالقادر مصرّف الاقدار
واعرف ان خلق الله فدبرته منساقه
تدور الليالي والفلك بالبشر دوار
يمر الزمان وساعة الوقت سراقه
قضى عمر عمي باامر من بـ/ايده الاعمار
وفي جمعة الايام جت ساعة فراقه
رحمك الله وعداك شر وعذاب النار
نهارٍ به المخلوق يخضع لخلاقه
يارباه يارحمن يالعدل يالغفار
بعفوك ولطفك به ورحمته واعتاقه
ومقعد وقار وصدق عندك مع الابرار
بعد ضافك مسلّم بعطره فشبراقه
سقا موضعك ياعم من رايحٍ مدرار
يشق الظلام الملتحم نوض براقه
زلالٍ غدوقٍ منعشٍ صادق الامطار
يسوقه عليك الوالي ويرخي اوداقه
ياراع الجناب الدمث ومعزب الخطار
ياراع القبول اللي معززته اخلاقه
ياراع الوفا والطيب والمرجله والكار
ياقرمٍ عن دروب العلا ماانثنت ساقه
ذخر بيت طيب وصيتٍ يشرف ومقدار
على العز مبني ومتراميةٍ اشناقه
ياعرّاب حرفي قبل اعدّه مع الشعار
ياعبروده وبارود ناره وتفاقه
يبى الوقت يمضي وانت حاضر مع الحضار
وسيرتك نارٍ فالشواهيق شعاقه
لو الحر غاب الحر عقّب وراه احرار
على ظنه ونهجه وعهده وميثاقه
عزا الرجل لا قفى عيالٍ تعز الدار
على كل فعل يرفع الراس سباقه
نجومٍ على اسمه كل حزه تشع انوار
وفي كل طاري له ينومس لها اشراقه
وصلى الله وسلم على صفوة الاخيار
رسولٍ بعث للخلق من عند خلاقه
|