[poem=font="Simplified Arabic,5,teal,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black""]
حلمي تبدد .. واكتسى ليلي اليآس = من يوم فارقني من الناس غالي
اللي تركني اضرب .. اخماس واسداس = من الندم .. اصفق يميني شمالي
كان الامل والحلم والصبر والباس = وانا بحبه كنت صعب المنالي
في ناظري اغلا من الدر والماس = كان الاماني والوفاء والمعالي
اول غرامه بالوفاء ماله قياس = واليوم مايدري عن اللي جرالي
اليوم خلا الفكر تايه ومنحاس = واصبحت عبره للقريب الموالي
كان الفرج للي شكى قل الاوناس = والمر ذقته لجل عينه زلالي
يا ناس دلوني عن الرآي يا ناس = ازريت اشيل الهم بعد ليالي
راح وتركني بين هم(ن) وهوجاس = ماكني اول من فديته بحالي
اثر الغلا صرح(ن) تشيّد بلا ساس = وانا عشقته صادق(ن) من اهبالي
حبيبي اللي للوفاء كان نبراس = وشلون يرخص قيمتي راس مالي
بنيت له في داخل الصدر مجلاس = وشيدت صرح الحب اول وتالي
موت المحبه بين حاسد وبلاس = وانا الضحيه ياصعيب المحالي
مرت سحابه والمعاليق يباس = وضاق الصدر والصبر ماله مجالي
طعنة غدر بآقصى خفوقي ولا باس = ادفع ثمنها من عذاب الليالي
صرخة خفوقي ضيّقت نبض الانفاس = ضج المكآن .. وضاق صدر الشمالي
اسرجت من خيل المعاني والاحساس = اجمل وصوف(ن) للحبيب المثالي
ماعاش رجل(ن) للهوى يخِضع الرآس = ومن صد عني ما رجيته وصالي[/poem]