السلام عليكم ورحمة الله وبركاته
قصيده ..مشاركه
ابا اتقهوى دامها اسهود ومهود
وانسى التعب وانسى هموم الليالي

في نايف ٍمزموم ماطبه الرود
ماكر حرار ٍ تعتلي كل عالي

واخاوي الهاجوس مع هبت النود
واخذ معه سجه على ماطرالي

واساير الايام والعمر محدود
والصدر فيه امن الهموم الثقالي

كل الليالي لاقضت صعبه تعود
اعدها ذكرى لعمر ٍ مضالي

والادمي يترك عنه كل منقود
لاعاش وقته بين مر ٍ وحالي

والمرجله تحتاج صبر ٍ ومجهود
اللي يباها فالتعب مايبالي

واللي يحب الطيب لطيب مردود
تتعب على شانه زحول الرجالي

والكلمه الجزله لها فعل مشهود
تبني بيوت الناس فأول وتالي

خلك ورى الهقوه ومنها ليا زود
واصبر على الاوضاع في كل حالي

واترك ضعيف النفس ماعنه منشود
وخلك مع اللي يحتمون التوالي
محمد مرزوق السميري