متواضعه جداً أرجو أن تقبلوها ...





حبيبتي.. وشلون اصبّحك بالخير

.............................. وأنتي صباح الخير والخير كلّه
ِ



صبح الندى والعشب والغصن والطير


.............................. وصبح الغيوم اللي علينا مطلّه




أنتي صباحات السعد .. والتباشير

.............................. على وجيهٍ بـ الرضا مسفهلّه




دامك صباحي وين مـ أروح و أسير

.............................. والله مـ أدوّر فوق راسي مظلّه




جيتي و صارت لك ضلوعي جماهير

.............................. ويتل منّها شوقي اللي يتلّه




ومدام جيتيني فـ أنا حالي بخير

.............................. لو كان جرحي ما أسترته الأجلّه




جيّتك هذي غير وأنتي بعد غير

.............................. جيـّتك مثل الوسم لاجا فـ حلّه




تزهر بها قيعان قلبٍ مداهير

.............................. وترد معها روح خـلٍ لـ خــلّه




يامرحبا يـ أغلى وأعز المسايـيـر

.............................. وأغلى المشاعر ( بيت اهلها تدلّه )



عروق قلبـي لـك دلالٍ مبـاهيــر

.............................. صفيتها دلّه .. ودلّه .. ودلّه




تربعي بين الحشا والازارير

.............................. وأخذي على ترويقة البال .. فلّه




والا أصبري .. بـ أطيّر القلب تطيـيـر

.............................. وأنتي تعالي وأجلسي في محلّه




سقت الغلا لك ... والنوايا مغاتـيـر

.............................. ولاهمّني حقد القلوب المغلّه




مدري صباح الخير والا مساء الخير

............................. بس المهم أن وجهك الخير كلّه


وسلامتكم،،،



مطلق بن شويه

...





alm_202@hotmail.com


...