[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black"]
كريم يالبارق اللي لاح من كل صوب = خيط ٍ من النور جيت تقود غرّ السحاب
بياضك البهلواني لانثنى للنصوب = شفت الصحاري تمد كفوفها للهضاب
كنّك تبختر وتربط بالشمال الجنوب = وترسم على الكون طعم ولون عقب اكتئاب
تسبح بعيني وانا استغفر واسبّح واتوب = وادعي عسالي نصيب من الدعاء المستجاب
استانس الليل ... يالله ذعذعي يالهبوب = واخذي نفس يالمشاعر تو مالهرج طاب
يا صمت .. يا بوح .. يانقطة تقاطع دروب = والبرق يفتح لعيني في دجا الليل باب
يابرق عطني من الهتان لو نص كوب = ضميان والريق ناشف والموارد سراب
تدري وانا من طلوع الشمس لين الغروب = امشي من الصمت للحيرة ذهاب واياب
اقرب وكانك عن الغيّاب تقدر تنوب = عندي سواليف مدفونة وشوق وعتاب
سولف على قد ماتقدر ومنت مغصوب = خذ مني الأسئلة هذي وعطني جواب
يابرق هو من يحب بجد يقدر يتوب؟ = والا المحبة على قلبه من الله عقاب ؟
يابرق كيف الصدوق العام يطلع كذوب؟ = وش غير الحال ؟ وين الحب ؟ ليه الغياب؟
يابرق طرد المقفي من كبار العيوب ؟ = والا التنازل عن الغالي هو اكبر عذاب؟
يابرق وشلون اخليهم ؟ وكيف الهروب ؟ = والارض في عيني اصغر من جناح الذباب

بالله شفلي على متن السحابة ركوب = مليت من وقفتي بين الخطا والصواب
والا قل لصاحبي حرام قطع القلوب = ان كان ودك تساعدني وتكسب ثواب
خله يجيني وياغافر جميع الذنوب = والا تراني خصيمه في نهار الحساب[/poem]