كريم يالبارق اللـي لاح مـن كـل صـوب
خيط ٍ من النور جيت تقود غـرّ السحـاب
بياضـك البهلوانـي لانثنـى للنـصـوب
شفت الصحاري تمـد كفوفهـا للهضـاب
كنّـك تبختـر وتربـط بالشمـال الجنـوب
وترسم على الكون طعم ولون عقب اكتئاب
تسبح بعيني وانا استغفر واسبّـح واتـوب
وادعي عسالي نصيب من الدعاء المستجاب
استانس الليل ... يالله ذعذعـي يالهبـوب
واخذي نفس يالمشاعر تو مالهـرج طـاب
يا صمت .. يا بوح .. يانقطة تقاطع دروب
والبرق يفتح لعيني في دجـا الليـل بـاب
يابرق عطني من الهتان لـو نـص كـوب
ضميان والريق ناشف والمـوارد سـراب
تدري وانا من طلوع الشمس لين الغـروب
امشي من الصمت للحيـرة ذهـاب وايـاب
اقرب وكانك عـن الغيّـاب تقـدر تنـوب
عندي سواليف مدفونـة وشـوق وعتـاب
سولف على قد ماتقـدر ومنـت مغصـوب
خذ مني الأسئلـة هـذي وعطنـي جـواب
يابرق هو من يحب بجـد يقـدر يتـوب؟
والا المحبة على قلبـه مـن الله عقـاب ؟
يابرق كيف الصدوق العام يطلـع كـذوب؟
وش غير الحال ؟ وين الحب ؟ ليه الغياب؟
يابرق طرد المقفي مـن كبـار العيـوب ؟
والا التنازل عن الغالي هو اكبـر عـذاب؟
يابرق وشلون اخليهم ؟ وكيف الهـروب ؟
والارض في عيني اصغر من جناح الذبـاب
بالله شفلي علـى متـن السحابـة ركـوب
مليت من وقفتي بيـن الخطـا والصـواب
والا قـل لصاحبـي حـرام قطـع القلـوب
ان كان ودك تساعدنـي وتكسـب ثـواب
خلـه يجينـي وياغافـر جميـع الذنـوب
والا تراني خصيمه فـي نهـار الحسـاب
تركي المورقي ..
إبدااااااع ..وربي إبداااااع ..
لله درك ومااااشاء الله عليك ..
للمفضله بدون منّه ..
ومعها إعجااابي ومتااابعتي المستمره ..
مودك/مستور الذويبي
|