أخواني وأخواتي .. اعضاء المرقاب الشامخ

السلام عليكم ورحمة الله وبركاته ،، والله يسعد أوقاتكم بكل خير ..


أول حاجه اسمحو لي بالحديث العامي يعني بلا فصيح وتنوين و إنشاء نحوي ميه ميه

من فتره والله وانا ودي اكتب هالموضوع .. ودي اسمع او اقرا من الجميع واشوف وش في نفوسكم كلكم ، انتم هل المحل وانتم اساسه وعزه والله مايسوى ولا ريال المرقاب بدونكم جميعا ..

والاداره اعضاء قبل لا تكون اداره الباقين انتم لاعدمناكم

الموضوع هذا .. مفتوح للي وده يقول شي ودائم يردد قوله بينه وبين نفسه حول كل شي يتعلق بالمرقاب ..

المدح ما نبيه الله يرحم من عقبّوكم .. ( واللي يبي يدخل علشان يمدح بس - والله اني مقدر مدحه وشكره بس أتمنى مع احترامي له ما يشارك ) والشك زايل بالنسبه لراي الاخوان اللي يدعون ان مافيه شي في بالهم .

والاطراء والتمجيد بعد مرفوض .. نبي شي يفيدنا جميعا ونتعلم منه سواء كأعضاء او كإداره ..

علشان كذا .. فيدونا افادكم الله وشاركونا باستمرار هذا العطاء اللي ما نقدر نقول فيه لا زين ولا شين الا بكم ومعكم

اللي عنده اقتراح .. رأي .. انتقاد .. عتب .. ضيقه من شي ماء .. توجيه .. تنبيه .. إقتراح .. ياجماعه نبي نفكر سوا وبحس عالي مثل ما يقولون ونبي نتصارح على المكشوف ولا اظنها صعبه ابدا .. خلونا نكسر الروتين كلنا اخوان وفي بيت واحد .. والتقصير ما ينكره الا المهبول ولا يدعي الكمال عاقل ‍؟

ودنا نطلع بتصوراتكم واللي تشوفونه انسب لاتخاذه .. وفيكم بركه جميعا من اخوان وأخوات .. واللي اقتراحه مفيد كلنا معه ..

والذي خلقني ويعلم سري ونجواي ما كتبنا هالشي من باب( اننا نشاور وبس ) والله العظيم اني ودي فعلا اسمع منكم و اقرا لكم ما تودونه واعرف توجهاتكم حتى لو كانت مستحيله وصعبه ما يمنع اننا نفهم بعض وندرك مطالب بعضنا ..

ودّي و ودّي و ودّي الكل يشارك ويعطينا هرجة صدره .. حتى اللي في نفسه شي على الاداره لا يخلينا نجهل تصوره ، والله انه مقبول لو ان عتبه شديد اللهجه وعلومه حاره (( مسموعين كلكم ولا فيكم مسفوه ))


خلصت الا من رحمة الله ...... والكلام لكم ..



أخوكم ،،

>> هات و دوك ! <<