خالد الحصيّن

مرحبا ومسهلا يا فيصل السواط
وجودك اسعدني وكلامك احرجني ولا عليك زود
حياك الله يا شاعرنا


1-لاحظت ان اكثر قصائدك هي على بحر واحد...فهل انت متعمد هذا ؟وهل ترى ان الكتابه على بحر واحد يعيب الشاعر..ام ان المضون يبقى الأهم؟؟

انا والله ما لاحظت يا فيصل .. لاني طرقت كل البحور تقريباً .. لكن للعلم من يحدد بحر القصيده هو موضوعها .. وبضرب لك مثال بسيط على ما قلته حيث ان اخر قصيده لي فالمواهب اسمها ( مباريات الدوري ومزاين ام رقيبه ) وموضوع القصيده هذي والمفردات اللي فيها لا يمكن ان تطرق الا من خلال البحر اللي بنيت عليه ! هذا مجرد مثال عشان تكون فالصوره .. وتفهم وش اللي اقصده .. وبالنسبه للشاعر اللي ما يكتب الا على بحر واحد فحسب وجهة نظري انه ما يعيبه .. ولكن لن تجد عنده تجدد فالطرح ولا تميّز فالاسلوب .. ممكن يتميز فالبدايه .. ولكن هذا التميّز سينضب ‍‍‍!


2-بأمانه هل تشم رائحة شلليه في المرقاب؟؟وإن كان....هل ترى ان الشلليه علامة رفع ام خفض؟؟

شوف يا فيصل .. الشلليه موجوده في كل مكان .. حتى فالمرقاب ، لكن الشلليه فالمرقاب غير .. لانها شلليه لا تنقص من قدر الغير .. بمعنى .. ان هناك مجموعه من الاعضاء تجدهم في كل قسم من اقسام المرقاب متفاعلين ومتفاهمين فيما بينهم وعلاقتهم قويّه حتى في خارج النت .. ولكن كما قلت انها لا تبخص حق الغير .. وتعتبر اجابيه من وجهة نظري ، ‍!


3-ماهو مقياس الجزل من الشعر؟؟؟في اعتقادك.

اختلطت المفاهيم يافيصل بالنسبه لتقييم القصيده ! .. فـ عندما تُقرأ قصيده عذبه رومانسيه فيها من الغزل الجميل ما يحرّك مشاعر المتلقّي .. فـ هل يكون تقيمها بانها جزله ؟ وعندما تُقرأ قصيده فيها تلاعب بالمفردات وحرفنه في صياغة القافيه ولا تخلو من القفشات الفكاهيّه .. فـ هل يكون تقيمها بانها جزله ايضاً ! .. القصيده الجزله من وجهة نظري يافيصل تكمن فالتمسك بالأصاله ، واختيار المفردات ، وقوّة الابيات وثقلها .. بغض النظر عن ما تحتوي من ابداع ‍!


4-لمن تقول الآتي:

-تجوع الحرّة ولا تأكل بثدييها..

تصدق اني بلشت في هالمثل وسألت واحد من الربع وقلت .. كيف يعني ؟ قال مثل ما تقول (الذيب ماياكل لحم ذرعانه) يعني المثل هذا اقوله .. لأم الذيب -> ( الذيبه )


-لايصح الا الصحيح..

لمن رفعوا راية ( لا اله الا الله )


-لكل مجتهد نصيب..

لـ عبدربه

khalid@mergab.com