الله يبقيك يبو مبارك ولا شكر على واجب طال عمرك
يقال بأن شعراء الأنترنت شهرتهم لا تتعدى حدود الأنترنت مارأيك؟
بما انك قلت شعراء الانترنت فلا ضير ان لا تتعدى شهرتهم حدود الانترنت ...ولمعلوميتك ترى الانترنت يعني العالم بأسره!
ولكن انا ضد مسمى شعراء الانترنت لان مافيه شعراء التلفزون ولا فيه شعراء الرادي ولافيه شعراء الفيديو وهلم جرّا
ما رأيك في الأقلام النسائيه ومن شدك من الشاعرات ؟؟
والله رايي في الاقلام النسائيه مثله في الرجاليه ...الجزل يبقى جزل هنا والا هنا من ذولا والا من ذولاك والشاعرات موجودات ولا احد ينفي وجودهم ابد
اما من شدني فبخوت المريّه وكفى!
هل الشعر فعلا يعتزل؟
لا
مارايك في الشعر الحر وهل هو فعلا موجود او كما يقول مبارك ال خليفه انه كلام فاضي ؟
والله ما اعرفه الا بسلامته ...ولو اني قلت لمعيض اني كتبته فانا كتبته مرّه وبطلب ولا ادري كتبته على اي بحرٍ فيه والظاهر اني كتبته على غديرٍ ماهو بحر! الوكاد اني دربجتها وتدربجت
ومسألة انه موجود فهو موجود حسب ما اسمع وان له جمهور غفير ما اعرف من هم ولا واحد!
وكلام مبارك آل خليفه ختم الجوده دايم
مارايك بشاعرات المرقاب ومن هي الشاعره التي شدت انتباهك؟ لاتقول كلهم نبي وحده
شاعرات المرقاب شاعرات ....يتفاوتون في المستوى والقدرات وفي الابداع
اما مسألة شد انتباهي فانتباهي تراه صعب ولا هي بأدناة وحده تشدّه!
لماذا لاتتابع الساحه والبرامج هل لانها لم تقدم شي ام لماذا؟
لأن المجلاّت غاليه ....وانا بصراحه استخسر 15 ريال في مجلّه 75% من محتواها خرابيط ودعايات لادوات التجميل عسى الله يجملنا ويجملك بطاعته
اما التلفزيون فأنا ما اتابعه خير شر الا فيما قل وندر ...وبرضو كل البرامج مش ولا بد
انا اتابع احيانا برنامج حمد العزب اذا كانت الفرصه مواتيه
والساحه يبغى لها واحد متفرغ لمتابعتها وانا ماني بمتفرغ ...والظاهر اني لو كنت متفرّغ ماتابعتها باهتمام
محاكيك لم يقتنع ولن يقتنع في النشر ماهو السبب ؟
لأنه لن يضيف لي شي ابد ابد ...بالعكس قد ينزّل من مستواي وقدراتي حتى تتماشى مع اغلب ماينشر!
مطلق النومسي
المجرم المحنّك الخطير في عالم الشعر
شاعر بني وايل لله درّه يعني لايوجد شعراء في بني وايل غير مطلق ؟!
الاّ فيه شعراء اكفاء في بني وايل واقرب مثال خلف المشعان وسليمان المانع على سبيل المثال لا الحصر ولكن يحلو لي ان اسمي مطلق شاعر بني وايل اعتقد انه ماهو ببمنوع اني اقول مايحلو لي اذا لم يكن منافياّ للأدب والأخلاق
بعدين شعر الغزل نقل جماعي كلٍ يقدر يركب فيه بس ماكلٍ يركب بوينق وفي الدرجه الاولى ! يعني افهم من كلامك ان قلبك ماهو خضر؟ وان شعراء الغزل مايعجبونك واللي يكتبه ماهو مبدع ؟
ههههههههههه اذا كان شعر الغزل هو اللي بيخليك تحكم ان القلب خضر والا لا .....فعساه يتمي جابس على طووووووووووووول
من قال لك ان شعراء الغزل مايعجبوني ...بالعكس فيه شعراء غزل يعجبوني جدا ولكن في غير غرض الغزل ....واللي يكتبونه فيهم المبدع وفيهم اللي من جنبها
ياعزيزي الابداع يكون دايم في الفكره لان البحور والقوافي ثابته والابداع في الافكار وطريقة عرضها
والمبدع مبدع في غزل والا في هجا ....لكن انا تنعدم عندي رؤية ابداع الغزل!
وانا بصراحه اميل كثيراا للقلطه ولو خيّروني بينهما لاتجهت للقلطه بدون نقاش ؟ومن الذي يمنعك من الاتجاه اليها هل انت مجبور على العرضه بالعلم ان الراي رايك؟!
انا لست مجبور على العرضه ولست ممنوع من الاتجاه للقلطه ....وانا قلت كذا حتى اثبت كلامي ان بإمكان شاعر العرضه ان يصبح شاعر قلطه وبإحترافيه بعد والعكس غير صحيح
وسلامتك وعفاك
واخيراً وليس اخراً اشكرك على صراحتك الذي بعض الاحياان ستفقدك الصديق الغير صااادق!!
لاشكر على واجب طال عمرك وانا متشرف بحضورك وباهتمامك يبو مبارك وواثق ان صراحتي معك لن تفقدني اياك لانك صديقٍ صادق عسى الله يطول عمرك على طاعته ورضاه ..وابشرك ان الصراحه اللي تشوف مابعد افقدتني واحد مثلك وشرواك!
ووجهك ابيض ...وانت كل اسئلتك ذهب والذهب ماينحذف منه شي
سلامي وكل احترامي
|