..
..راكب اللي ما دفع فيه (تاجر ) ..لو ريال
مشتريه اقساط .. والبنك يـوم يسجلـه
قلت خوذو ما تبونه من فلوسي حـلال
والله أن الجيـب هـذا ماعـاد ابـدلـه
واشتريت اللي مديلـه جديـد ولا يـزال
تو .. تويوتا في العـرض تـو تنزلـه
طوروا شكلـه وخلـوه للعالـم هبـال
أي لون من اي الالـوان فوقـه يقبلـه
قلت ابي هاللي لو تصوّر بجنبـه نـوال
ضاع الأشقر واللي معلـقٍ بالسلسلـه
يوم حركته تقل في رصيدي راس مـال
او تقل عندي جميـع الصعـاب مذلّلـه
اول اسبوعيـن كنـه ينادينـي تـعـال
نوب ماسـك طارتـه والعبـاد مقيلـه
ما مشى الا الفين كيلو ولا طب الرمـال
عن طريق ٍ مستوي ما قـدرت اميلـه
قسطه الأول يبا يحل عقب اربـع ليـال
مثل مولـودٍ بـدا بالحيـاه مـن اولـه
ما بعد راعيه جوّد على الراس العقـال
يوم من عالي لواطـي يجيـك محولـه
مع نفود ٍ لا تمثنيتهـا صـوب الشمـال
طيّحت عنك المسافـات وهـي مكيّلـه
والله أني ما نويت اركنه تحـت الظـلال
ما شريته فوق ميه مـن اجـل ادلّلـه
تعرفون اللـي يدلـل ويزهـاه الـدلال
والله اللي في جمالـه وحسنـه كملـه
والا مثل الجيـب ودك يعـدي بالطـوال
وأن بغيت تحمله مـن زهابـك حملـه
مثل لاقيل الحفر سال والصمـان سـال
والا قالوا لـك جميـع الديـار مسيلـه
والربيع يغطي اللي تطيـح مـن الـدلال
ريحته تطغي علـى كـل ريـح مهيلـه
اشهد أنك ما انت قاعد ولا مرتاح بـال
لو تأخر يـوم يوميـن يشغلـك الولـه
لين تزهملك نشاما خيـار مـن العيـال
ما بهم واحد عليـه الشكـوك مخيلـه
ليلة ٍ معهم تعوضك عن بعـض الليـال
كنهـا مـن بينهـن كنهـا مـتـسلله
القصايد والسوالف ومزح وطيـب فـال
والدلال اللـي لجمـر الغضـا متحملـه
لو سئلني واحد وقال ياشاعـر سـؤال
السؤال اللي ما معنـاه يومـه يسئلـه
لو بغيت توجه الجيب لزحـول الرجـال
في قصيده وين يا ابن الظواهر ترسلـه
قلت للي دينهم .. دينهـم كبـر الجبـال
مـا قـدرت اسـدده بالسنيـن الأولـه
كل يوم اقول ابا اضرب بهم اروع مثـال
لين حـار الفكـر والا ياكثـر الأمثلـه
والأبيات ان كان تبغاني ادمح هالخمـال
لا تصير بسجن غالب سعـود مطولـه
ما عليها الا تنهّـض وتمشـي بعتـدال
وكل( بشري) بين ذيك العيـون تقبلـه
لابة ٍ تاريخهم تقل مـن صنـع الخيـال
صعب تحريفه على العالـم المتسولـه
اشهد أنه مرتفع بالسمـا مثـل الهـلال
جمّل الله حـال مـن بالفعـول يجملـه
والله أني اعتبر كـل طيـب لـي خـال
ماهو بس( الجدعي) اللي بعال المنزلـه
شايبٍ كمّل مية عـام وفعولـه لحـال
بالأمـور الكايـدات الكبـار محمـلـه
تتعب اللي وده يقلـده فـي كـل حـال
الشجـاع تحركـه والجبـان تهـولـه
ويوم طاح الذيب طاحن معه كل الثقـال
والليالـي كنهـا وربــي المتحـولـه
أرزمت حتى نياقـه تبـي ذرب الفعـال
كنها عقب اكـرم القـوم تقـل مهملـه
اشهد أنه ورّث الطيـب حتـى للحـلال
النياق تـدر للضيـف وهـي مشملـه
يالله أنك ترحمه رحمتك يـا ذا الجـلال
يوم كلن فـي حسابـه يصيـر لحيلـه
عبدك اللي قال وأنا اسمعه لحظات قـال
لا اله الا انت والعمـر باقـي ممهلـه
يا كريم اجعل له الجنه الخضراء ظـلال
وبين ابو بكـر ومحمـد ياربـي نزلـه
الله الله ياسلام
شكرا الشاعر الكبيرغالب الظاهري على ذاالقصيده الرائعه قصيده من شاعر نستفيد من متابعته وغني عن التعريف :
تقبل تحياتي وتقديري
أخوك حسين الدوسري
|