منتديات المرقاب الأدبية - عرض مشاركة واحدة

02-05-2006, 02:38 PM

بالله قلي يا زمان المهزله يا محترم
شاللي بقى من عالمك .. قلي وانا بستوعبه
-
-
علمتني كل الدروس .. وقلت لي كل الحكم
لكنك أخفيت الحقايق .. وأبتلعت الأجوبه
-
-
أما أنت كذاب وردي .. والا أنا ما افتهم
واحد من الاثنين فينا .. ما وثق في صاحبه
-
-
لو تلتفت يا سيدي وتشوف تاريخ الامم
ما قلت لي ان الزمن هذا .. جهاد وتجربه
-
-
هذا الزمن ما يعشقه ويعيش فيه الا الصنم
ما تقدر تميز غثاه .. وبلبله من عقربه
-
-
-أختلطت الاوراق فيه وصار بالوادي قمم
حتى الصغيّر يا زمن قام يتفاخر بشنبه
-
-
فيه الردي أصبح مهم .. ويحترق فيه الاهم
عالم من الكذب الرخيص ..وعالم من الاتربه
-
-
الوقت يلعب لعبته .. والذيب هاب من الغنم
معذور ذيبك يا زمن .. لو جاه طفل وهيبّه
-
-
بيت يهدده الضياع وتنشرى فيه الذمم
لاعاد تشره يا زمن لو جاه ضيف وخربّه
-
-
والظلم .. قلي من بقى في هالزمان ولاانظلم
والا انت خايف تظلم الظالم .. وتدخل مكتبه
-
-
اليا متى نوخذ لحم .. ونرد مافينا لحم
ياللي بنيت من العظام البيض سلمّ واعتبه
-
-
لاصار طيبك يا زمن عن الردى ما ينقسم
ليه نتعذب يا زمن في هالنفوس الطيبه
-
-
لو فيك خير .. ان كان ما وزعت كلمة والنعم
وخليتها بين الخلايق تنعطى مثل الهبه
-
-
ولو المراجل نتشرى وتباع في حبّة خشم
ماشفت لك حر يصيد وعزته في مخلبه
-
-
ولو كل من حدّه زمانه باع صوته .. وانطرم
ما بيّن الأبداع بالدنيا .. وشفنا الموهبه
-
-
كم خلّد التاريخ من مبدع .. وكم خلّد أسم
شيّب براس العالميبن وراح محدٍ شيبّه
-
-
للحين راسخ في جبين الذاكره مثل الهرم
ماتقدر الدنيا ولا التاريخ يقدر يشطبه
-
-
واليوم جا من غيّر الأفكار في جرة قلم
يكتب .. ولكن للأسف ما يفهم اللي يكتبه
-
-
يلهث ورى طرد السراب وعايش بدنيا الوهم
ويستغرب ان الناس هذي كلها تستغربه !!
-
-
عنيد .. ما يرضى يطيع ويقتنع انه قزم
يصدق اللي صفقو له .. والصدوق يكذبه
-
-
لله درك يا زمان ان كان هذا اللي حكم
وخليتنا في خدمته ونلمعه ونهذبه
-
-
عطيته اللقمة ولكن صار في حلقك .. عظم
غص .. وتفضل ما عصرته في يدينك وأشربه
-
-
اليا انكسر قوس الحريب .. اش فايدة هذا السهم ؟
واليا انكشف ستر العذارى .. وش تفيد الأحجبه ؟
-
-
الليل يسري وأنت يا ساري حزين ومنصدم
أسهرت عينك والدروب اللي تبيها متعبه
-
-
هيا انسجم مع زمانك .. طيع شوري وانسجم
واليا بغيت تعاتبه .. خل القصيد يعاتبه
-
-
الوقت لو يسمع كلام الناس ما جار وظلم
لكنها من عصر أبونا آدم وهي متقلبه
-
-
الوقت هو الوقت .. والمحظوظ من خاف وسلم
كم واحد ٍ قبلك تحداه الزمان .. وغيبّه

لله درك
لله درك
لله درك
لله درك
لله درك
لله درك

لااله الا الله ..

ابداع وحرفنه لايتقنها الا الكبار والكبير سبحانه ,

صح لسانك عدد شعوب الارض يابطل ,

سلامي واعجابي