الاخوه الاعزاء
تحيه طيبه وقصيده جديده اقبلوا تواضعها


[POEM="font="Simplified Arabic,4,darkblue,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]فرقاك واقع مرّ ووصالك احلام=والواقع اقرب من بلوغ الحقيقه

مليّت وانا اعشّم اوهام باوهام=واحمّل التفكير مالايطيقه

مااقول لك جسمي غدا جلد وعظام=ولااقول عيني بالمدامع غريقه

مجرّد اني ضايق الصدر مادام=وصلك ماهو وصل العشيق لعشيقه

مرّات اقول :اصبر عسى الوصل قدّام=ومرّات اقول: انسى الوصال بحريقه

كم من سنه بنعيش؟ واعمارنا ايام=وايامنا ماهي وجيه ٍ طليقه

ماذوّقتنا غير لوعات وآلام=وتوّسع صدور الحزانا بضيقه

اتعلمّك كيف الرياجيل تنضام=وتحسب حساب الثانيه والدقيقه

البارحه يوم اغلب الناس نيّام =قلت آآآآآآه ثم فكرّت بافضل طريقه

خذت القلم من هاجسٍ بالحشا حام=ومدّيت له كف الصديق لصديقه

اروي معاطيش الصحايف بالاقلام=ابغى الورق من حبري يبلّ ريقه

يفشّ غلّ اللي بصدري من العام=ويفكّ شفرات الجروح العتيقه

والخاطراللي صام وافطر على صيام=مافيه شي ٍ عن طموحه يعيقه

ماقد نظرت لحجم الاشيا والارقام=الورد يغني عن جماله رحيقه

انا كذا حازم وجازم وعزّام=والشوك ماردّ الجمل عن طريقه

اما توّفقنا بتحقيق الاحلام=والا الصبر على مرار الحقيقه[/POEM]