بسم الله الرحمن الرحيم
السلام عليكم ورحمة الله وبركاته

عندنا اللي يتأخر عن الاحداث المهمه
يعاقب نفسه بالتنسيق



اســــتلامكم الابداع


محمد جارالله
يا سلام الله سـلام ملـوك وشيـوخ وفخامـه
ما يساق الا على رجـال يسـوى لـه قبيلـه
عطلّـوا ثلثيـن خلـق الله ومـرزوق بدوامـه
مادخل في روضة المسجد مع اصحاب الفضيله

مرزوق العتيبي
مرحبا رحب امبراطوري وفي راسه قرامه
في الحضور وفيك يا رجال ما نلقى بديله
يا محمد لا تلحقّني مشاريه وملامه
وانت خابرني طويل وخطوتي مثلي طويله

محمد جارالله
من غلا مرزوق .. نتركها ذكا ولا غشامه ؟
في الامور الممكنه ولا ّ الامور المستحيله !
ليلة البـارح تغشّتـك المخيلـه والغمامـه
مير ما ابتلت يدييك من الغمامـه والمخيلـه

مرزوق العتيبي
الوسيله .. دون .. والغايه على راس العدامه
وانت في الغايه تبرر لك يجي 100وسيله
بكرة المصلاح جتك مشمله يا ابو دلامه
وانت ضيّعت الصرار ومنك يا كبر الفشيله


محمد جارالله
لاتقول انك الوحيد اللي على راسك عمامه
خابرك قدام هـذي كـل حمـل ٍ ترتكيلـه
عيبك انك تنشد الكذاب وتصـدق كلامـه
وضعت باول متر وانا احسبك رجال ٍ دليله

مرزوق العتيبي
انت لو تنزل بك الاقدار في وادي تهامه
تلدغ لحيه وتشرب سمها في كل ليله
مرثعن في نصف خلق الله وقوّمت القيامه
ما تخبّا غير في لبا وفي العين الكحيله

محمد جارالله
صاحبي مرزوق .. واستاذي ويعجبني نظامه
آتعلم منه .. وآساعد علـى تطويـر جيلـه
ما يجوز انّك تصلي دون .. تكبير وإقامـه
خل قوم الليل للي تقدر عظامـه تشيلـه !!


مرزوق العتيبي
يا سلامه لا تحاول .. لانجاه ولا سلامه
لين تهدر للجمال ولين تشتال الثقيله
انت شاعر ما علي من اللي يقول الوسامه
يا حليل اللي يقول القول هذا يا حليله


محمد جارالله
مشكلة مرزوق .. يحسبني بلا عقل وفهامه
يوم انا غالبه حيل ويوم انا غالبـه حيلـه
ما بلشت بضايع التفكير والخبـل الهلامـه
جا على بند الاجور وقام يشمت في كفيله!


مرزوق العتيبي
كل واحد محترم يفرض على الناس احترامه
والجزيله مالها الا كف عشاق الجزيله
يا محمد واصل الغارات في حرب الرغامه
لين تطلع سابق الفارس ونعرف وش حصيله