عبدالله بن قنيص

جيتك جيتك <<< مطفي الانوار
جتني فيك ياشفق


س1/ جاك رجال تكانه و صادق في جيته و يبي يخطب.. بس شرطه يشوف
وجه الخطيبه (اختك او بنتك) على الشوفه الشرعيه التي وصفها النبي..
هل تتفق و توافق الشريعه هنا ام ترفض الشريعه ؟؟


ان اتفقت ووافقت الشريعه فهذي شريعه وان اتفقت ووافقت العوايد والسلوم فهذي عوايد وسلوم وسلامتك

س2/ طلبك واحد تشهد له و انت صادق في شهادتك .. يعني ماهيب شهادة
زور.. و يوم قابلت الشيخ.. قال الشيخ شهادتك ما اقبلها.. لأنك يا حالق اللحيه
أو تشرب التتن. أو مسبل ثوبك.. و هذا الشيخ عنيد.. وش راح تكون ردة فعلك
و كيف راح يكون شكل وجهك بين الناس الجالسين؟؟ يعني كيف راح تتصرف؟

بالنسبه لشكل الوجه هذا شي راجع للوجه مدري عنه
اما كيف ابتصرف ابد الامر طبيعي ابقول ياشيخ الشرهه على اللي جايك وابضرب البااب


س3/ انت معزوم على عشا عند رجال و العشا لك انت يعني انت الضيف..
و الجار هذا من قبيله و انت من قبيله.. و يوم جيت تروح للعشا بعد صلاة
العشاء الا و هذولا ضيوف جايينك لأول مره.. انت تبي تاخذهم معك للعشا او تتركهم
بدون حق الضيافه؟؟ مع العلم انهم رفضوا يروحون معك لعشا الرجال اللي
مضيّفك.. و لو ما سوّيت عشاهم راح يزعلون و يمكن يسرون من ليلهم..
يعني فيهم البداوه الشديده الى ابعد حدودها.. و المشكله ان الجار هذا ما يعذر مره..

الامر بسيط ابجيب كرامتهم وعندهم اخواني يسدون اللزوم لين اجي وانتهى الوضع



س5/ اصيبت زوجتك و ( ابنتك ) ذات الست سنوات لا سمح الله باصابات قاتله..
و انت مضطر لأخذ احدهن و ترك الأخرى لأن سيارتك ما تشيل
معك الا شخص واحد.. فمن تأخذ الى المستشفى و من تترك يواجه مصيره؟؟

ابشرك اني لازوجه ولا بنت وبخير وستين نعمه مايشملني السؤال هذا
<<< مرفوع عنه القلم

س6/ لم يعطك الله الا ولداً وحيداً فقط و بعدها كتب الله عليك عدم الانجاب
و هذا الولد عمره 15 سنه يعني املك الوحيد في الدنيا.. و لك اخ واحد فقط
في هذه الدنيا.. و ليس لك اخ غيره.. و خُـيّرت بأن تفتدي احدهما بالآخر..
يعني واحد منهم راح يلامج المقصله.. و الآخر راح يبقى معك.. من تختار
للمقصله و من تختار معك؟؟؟ مع ان الولد يستغيث بك و الأخ مسلّم الأمر
لك في مصيره و تشوف الأمل في عيونه انك راح تنقذه...

اهييييب الله ينشبك ياشفق
الاخو الاخو ورح لهلك خل الولد يلامج المقصله
<<< ماله لا ولد ولا تلد
الولد مولود والاخو مفقود يقولونه اللي قبلنا

س7/ انت ساكن في حيّ و هذا الحيّ لا يوجد فيه من قبيلتك احد سواك..
يعني انت اللي تشيل اسم قبيلتك في هذا الحي من بين بقية القبائل الأخرى..
و عزمك جارك على عشا لضيوف من ربعه.. و عزم كذلك بقية الجيران..
و جيت انت و ما شاء الله تبارك الرحمن ملكت المجلس بالسوالف و العلوم
الغانمه و تكابروك الضيوف و اعجبوا بك و بحضورك الرجولي الكبير..
المهم قمتوا على العشا.. و حلفوا عليك الضيوف الا تكون معهم و بالفعل
قمت معهم.. المهم و يوم جيت تجلس معهم يامرك الله و انت ( اتخـَـثـَـع )
الا و انت متربّعٍ بيديك في جوف الصحن و جيت ترفع يدينك من حرارة الرز
و المفطح و انت تخثع بركبك الا ركبك في جوف الصحن.. المهم راح المفطح
في لوذه و الرز في لوذه و انت حالتك حاله و الضيوف حالتهم حاله ..
سلامات سلامات و ما تشوف باس... مع ان الباس كله متقـنّـعك.. و احرمت
الضيوف عشاهم و خرّبت على جارك ضيفته.. انت بعد ما غسلت من البلاوي
اللي انت سويتها .. وش راح يكون موقفك و كيف راح تعالج الموقف..
سواء موقفك من عشا جارك لضيوفه او موقفك من الضيوف او موقفك من
نفسك.؟ هل:
1- راح تجيب لهم عشا مندي؟؟ هذا اذا حصّلت بعد..
2- راح تسوي عشا لهم في بيتك.. مع العلم ان ماقفة الغنم مسكّره..
3- راح تعتذر بالكلام و تعزمهم على عشا القابله؟؟ مع ان جارك له حق و ضيوفه لهم حق..
4- راح تسوي ذبيحتين والا عشر؟؟؟ مع انك لو تسوي مية ما تساوي فشيلتك قدامهم..

او راح يكون لك رأي آخر؟؟ و ماهو ؟؟

هنا بعد الامر بسيط

ابد اسمع طبعاً انا خثعت وقدر الله وما شاء فعل وانا من صبح اقرق عليهم ويابلفيت انّي ماني بهيّن ومن هالكلام اكيد انهم بيعذرووني

العلم اني ابرووح للشبك ياطويل العمر بلا ماقفة غنم بلا بطيخ وابسحبلي منه طليين واوديها البيت يطبخونها واجيبها لهم واضربها بين يديهم واقلطو الله يحييكم واعذرونا على الخثعه تراها لا اراديه يالربع
<<< مهاااايطي

وانت يالمعزب الله لايعيدك انت وعزيمتك


الله الله


وانت ياشفق الله ينشبك فيهن كلهن قل امين ياخووي اسئلتك هذي تخلي الرجال ينفهق ورااه شوي

!!

.
.