منتديات المرقاب الأدبية - عرض مشاركة واحدة

09-12-2006, 06:08 PM

س1/ جاك رجال تكانه و صادق في جيته و يبي يخطب.. بس شرطه يشوف
وجه الخطيبه (اختك او بنتك) على الشوفه الشرعيه التي وصفها النبي..
هل تتفق و توافق الشريعه هنا ام ترفض الشريعه ؟؟

ج1/بالنسبه لي أوافق و أما الشايب و الله إن يبطي عظم

س2/ طلبك واحد تشهد له و انت صادق في شهادتك .. يعني ماهيب شهادة
زور.. و يوم قابلت الشيخ.. قال الشيخ شهادتك ما اقبلها.. لأنك يا حالق اللحيه
أو تشرب التتن. أو مسبل ثوبك.. و هذا الشيخ عنيد.. وش راح تكون ردة فعلك
و كيف راح يكون شكل وجهك بين الناس الجالسين؟؟ يعني كيف راح تتصرف؟

ج2/و الله إنها بلشه .. إن قلنا معه حق فمعه حق .. و إن قلنا ما معه حق فما معه حق
الوكاد أني بأطلع و لاني بمسوي شي

س3/ انت معزوم على عشا عند رجال و العشا لك انت يعني انت الضيف..
و الجار هذا من قبيله و انت من قبيله.. و يوم جيت تروح للعشا بعد صلاة
العشاء الا و هذولا ضيوف جايينك لأول مره.. انت تبي تاخذهم معك للعشا او تتركهم
بدون حق الضيافه؟؟ مع العلم انهم رفضوا يروحون معك لعشا الرجال اللي
مضيّفك.. و لو ما سوّيت عشاهم راح يزعلون و يمكن يسرون من ليلهم..
يعني فيهم البداوه الشديده الى ابعد حدودها.. و المشكله ان الجار هذا ما يعذر مره..

ج3/ بأقول لهم حياكم الله على واجبي و واجبكم باقي فإن نووا يعسروني خليتهم و رحت لجاري
الجار يبقى مع الزمن و ألا الضيف بياتي ويروح..... و الله مهما أرقع فيها أنها محقا

س4/ اصيبت زوجتك و ( ابنتك ) ذات الست سنوات لا سمح الله باصابات قاتله..
و انت مضطر لأخذ احدهن و ترك الأخرى لأن سيارتك ما تشيل
معك الا شخص واحد.. فمن تأخذ الى المستشفى و من تترك يواجه مصيره؟؟

ج4/لا حول و لا قوة إلا بالله يا و الله العسر
بأخذ البنية ... ولا تدري بأقعد مع الثنتين يموتون سوا و لا يحييون سوا

س5/ لم يعطك الله الا ولداً وحيداً فقط و بعدها كتب الله عليك عدم الانجاب
و هذا الولد عمره 15 سنه يعني املك الوحيد في الدنيا.. و لك اخ واحد فقط
في هذه الدنيا.. و ليس لك اخ غيره.. و خُـيّرت بأن تفتدي احدهما بالآخر..
يعني واحد منهم راح يلامج المقصله.. و الآخر راح يبقى معك.. من تختار
للمقصله و من تختار معك؟؟؟ مع ان الولد يستغيث بك و الأخ مسلّم الأمر
لك في مصيره و تشوف الأمل في عيونه انك راح تنقذه...

ج5/ و الله بأخذ أخي ... الولد ما وراه بزران و لا مره و لا أخي وراه من يرتجيه
و عز الله إنك لعبت فينا يا شفق

س6/ انت ساكن في حيّ و هذا الحيّ لا يوجد فيه من قبيلتك احد سواك..
يعني انت اللي تشيل اسم قبيلتك في هذا الحي من بين بقية القبائل الأخرى..
و عزمك جارك على عشا لضيوف من ربعه.. و عزم كذلك بقية الجيران..
و جيت انت و ما شاء الله تبارك الرحمن ملكت المجلس بالسوالف و العلوم
الغانمه و تكابروك الضيوف و اعجبوا بك و بحضورك الرجولي الكبير..
المهم قمتوا على العشا.. و حلفوا عليك الضيوف الا تكون معهم و بالفعل
قمت معهم.. المهم و يوم جيت تجلس معهم يامرك الله و انت ( اتخـَـثـَـع )
الا و انت متربّعٍ بيديك في جوف الصحن و جيت ترفع يدينك من حرارة الرز
و المفطح و انت تخثع بركبك الا ركبك في جوف الصحن.. المهم راح المفطح
في لوذه و الرز في لوذه و انت حالتك حاله و الضيوف حالتهم حاله ..
سلامات سلامات و ما تشوف باس... مع ان الباس كله متقـنّـعك.. و احرمت
الضيوف عشاهم و خرّبت على جارك ضيفته.. انت بعد ما غسلت من البلاوي
اللي انت سويتها .. وش راح يكون موقفك و كيف راح تعالج الموقف..
سواء موقفك من عشا جارك لضيوفه او موقفك من الضيوف او موقفك من
نفسك.؟ هل:
1- راح تجيب لهم عشا مندي؟؟ هذا اذا حصّلت بعد..
2- راح تسوي عشا لهم في بيتك.. مع العلم ان ماقفة الغنم مسكّره..
3- راح تعتذر بالكلام و تعزمهم على عشا القابله؟؟ مع ان جارك له حق و ضيوفه لهم حق..
4- راح تسوي ذبيحتين والا عشر؟؟؟ مع انك لو تسوي مية ما تساوي فشيلتك قدامهم..

او راح يكون لك رأي آخر؟؟ و ماهو ؟؟

شوف ...يلقى العاقل من الكلام اللي يخارجه و يبقى على كبره في عيون الرجاجيل
بأعشيهم عشاء عادي و بأعزمهم القابله على واجبهم و بأذبح ثنتين
وحدة للضيفان و وحدة لجاري اللي فشلته في ضيفانه

و السلام ختام .. و أنت يا شفق بيلحقك منا أثم يا أخي وش ذا الأسئله