السلام عليكم ،
من توقيع .. لطلب غالي .. لأبيات متواضعه ،
على مركب غرامي قمت أغنيّ والقصيد بحـور
نفضت شراع صدري والهوى ما فضّها سيـره
أشيل المحبره واللي عطاني ريشـة العصفـور
نزع صمتي وخلاني مـع الصبـح وعصافيـره
يا بنت الناس قلبي في مدار الحـب جالـه دور
تعب نبضه على دربك بعـد طالـت مشاويـره
مسجلّ لك شهادة حـق ماسجّـل شهـادة زور
خذا من دقتـه رايـه وسجّـل عنـك تقريـره
ولو يصبح شعوري لك على صفق الهوى منثور
جمعتيـه بحذافيـره .. وأخذتيـه بحذافيـره !
عسى قلبك مثل قلبي من أوناس العناء ماجـور
بعد صرنا من أعلام الغـرام ومـن مشاهيـره
وأنا مدري عليّ قصور وإلاّ مـا علـيّ قصـور
لكنّ الحـب هـاذي معطياتـه لا كثـر خيـره
يفك الباب للأحبـاب ويرمـي فالظـلام النـور
تعبنـا مـن خطايـاه ونشبنـا فـي معاذيـره
تواضعنا علشان الغلا .. ميـر الغـلا مغـرور
كبر وأستكبر .. وبينـي وبينـك زاد تقديـره
تذكّرت الكلام اللـي تقولينـه بـدون شعـور
ونسيت أني حبيب ٍ ما سكن في مهجتك غيـره
أجيك وخاطري يضحك وأروح وخاطري مكسور
وأنا صبري مثل صبره على كسـره وتجبيـره
أحبك والمحبّـه مـا تمـوت وبيتهـا معمـور
تزيد وكـل مـا زادت ظهـر للحـب تبريـره
علاقتنـا ربيعيّـه وقـاع ٍ شالهـا ممـطـور
لاشكّ الحبّ ما يرحـم ليـا هبّـت معاصيـره
ألا يا طول شرحي مير جرحي ما يبـي دكتـور
تداويه المـودّه مـن عـذاب الشـك والغيـره
وسلمتوا ،،
ومن قال يسلم
انا متابع ماتطرح مار فالشعبي ولا فالمواهب
صح لسانك يا دكتور
|