قصيده في الحكمة للشاعر / فليّان بن ماضي ابو راس السبيعي
الله يطوّل في عمره ويمتعه بالصحة والعافية

والد المرقابي/ محمّد السبيعي

قصيدة إنتشرت بشكل واسع في إذاعات دول الخليج وخصوصاً إذاعة السعوديه والكويت

ونشرت في كتاب (نفح الطيب ممّا قيل في الدنيا والحظ والشيب) للأدغم السبيعي

يسعدني أن أقدمها لكم هنا في مرقاب السديري
[poem=font="Simplified Arabic,5,blue,normal,normal" bkcolor="transparent" bkimage="" border="none,4,gray" type=2 line=1 align=center use=sp num="0,black"]
من دار بالدنيا .. وطالت حياته=يشوف اشيا ماتجي له على البال!

يرى التغيّر في زمانه وذاته=والوقت يكشف حال .. ويخفّي أحوال!

ياجاهلٍ بالوقت هذي سواته=لاتحسب إنّه مستقرٍ على كل حال!

إسأل كبير السنّ عن ذكرياته=ينبيك عن ماضيه ياطيّب الفال

يعطيك عن جيله وعن بيّناته=دلايلٍ تبقى على مرّ الأجيال

والعلم مطلوب الثقه في رواته=ولاكل علمٍ قيل يكتب وينقال!

وعلمٍ بدون إسناد وش فايداته؟=مثل السراب يلوح .. وإن جيتله زال!!

ومن لايقابل بالوجه مشكلاته=تكثر عراقيله .. ويزداد غربال!!

كم ساكتٍ يخفي البلا في سكاته=يخاف لو يحكي من القيل والقال!!

لو هي جروحه بالحشى موجعاته=ماقال آه .. ولايبيّن لـ عذال!!

من خوف لايدروبه أهل الشماته=يكتم .. وهذي عادة الناس الأبطال!

ومن لاكتم سرّه .. بيفقد ثباته=والسر مايبدى على كل رجـّال!!

كم واحدٍ جت نكبته من ثقاته=من مأمنه .. كل البلاوي والأهوال!!

وصار السبب فـ أوجاع قلبه وذاته=لاعاد يزعل يوم كثرنّ الأقوال!![/poem]

.