جامع الأزهر بعـد زاد ارتفاعـه
الدكاتر فيه صـاروا عربجيّـه !
صرح ديني مير من راسه لقاعه
ما يقوم إلاّ على حسنـه وسيّـه
آخر الصيحات فتـوى للرضاعـه
من وسيع المعرفه عزّت عطيّـه
قال يوم أنه لبس ثـوب الدناعـه
وشمّ ذعذاع الريـاح الموسميّـه
الزميله في عملهـا وبشجاعـه
تنحنـي للـي يزاملهـا شويّـه
ترضعه من صدرها لو ربع ساعه
لين حتى تصبح الخلـوه نقيّـه !
قام يعرضها مثل عرض البضاعه
خالف وتعرف .. وسوّا له قضيّه
ول يا استاذ الاحاديث المشاعـه
قمت تنقـز بالسريعـه والبطيّـه
انت لو عندك عن الدنيـا مناعـه
ما تلوّا بيـن ذيـك وبيـن ذيّـه
لا تدوّر عندنـا سمـع ٍ وطاعـه
ديننا محفـوظ مـن رب البريّـه
علة الشيخ المسمّى في نخاعـه
يفتي وقلبه كبـر قلـب المطيّـه
مير يا ليته يعلّـق مـن كراعـه
بين بـرج المملكـه والفيصليّـه
الفتاوي من مشايخـة الصياعـه
لاهي من الله ولا هي عن نبيّـه