قصيدة بمناسبة دعوة مذبح القعدان / حمود بن شافي العتيبي لرفيقه الشيخ / عسّاف بن فهيد الحضبي
في محافظة القويعيّة وذلك عندما قام حمود بزيارة عساف في الخرمة حيث أُقيم له حفل هناك فما كان من
حمود إلا أن رفض مغادرة الخرمة إلا بموعد ...
راجيا من الله أن تحوز على شيء من رضاكم ..





[POEM="font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]احتمى سوق المعاني واستوى نضم القصيـد = كل شاعر نفسه مـن عصيـر بيّـح سدّهـا
الحروف اليعربيـة والمعانـي زول صيـد = وفّق الله من جمعها فـي البيـوت وعدّهـا
ما انقطع شعر الفرزدق وامرؤ القيس ولبيد = مهـرةٍ يطلـق رسنهـا والموفّـق شـدّهـا
ياالله إنك لاتجنبنـي عـن القـول الرشيـد = وكلمـةٍ تلحقنـي المنقـود يــاالله لـدّهـا
ليل يجمعنا بعطران الشـوارب ليـل عيـد = كـان ذا ودّ الليـال وكــان ذا مـاودّهـا
انتواصـل بالسـلام وبالسوالـف والنشيـد = دلـةٍ صبيتهـا ياحمـود عــوّد ردّهــا
خوّةٍ مابيـن ابـو شافـي وبيـن ابوفهيـد = كسرة الكمبـود والجـاوي يذعـذع ندّهـا
جمل الله حال دعوة منبـع الـراي السديـد = وجمّل الله حـال رجـلٍ دعوتـه ماردّهـا
احتزمنا يوم نادى الشيخ تركي بـن حميـد = كلمته مـا امـداه ينهيهـا ووصلـه ردّهـا
هكذا انّا في رخا الأيـام والوقـت الشديـد = مزحها مازاد لو ربع شعـرة عـن جدّهـا
اجتماعٍ مـع عتيبـة يعتبـر عمـرٍ جديـد = جمعةٍ تسوى كثيـر مـن السنيـن وكدّهـا
عـلّ والله ذكـر طلقيـن اليمانـي مايبيـد = سالفـة ومحمـد الشرهـان قـام يعـدّهـا
معرفة شروى حمود من العرب كنز ورصيد = ثروةٍ لو عدّها العـداد مـا اقطـب عدّهـا
الكفوف الحاتميـة تقضـي الديـن وتزيـد = مدّت كفوف النشامـا مـن فضايـل نَدّهـا
الولـد تتلـى عليـه الفاتحـة حـدّه وليـد = والكريـم حمـود زوّدهـا ونجلـه قـدّهـا
لانصتك ضيوف قابلها ورحـب مـن بعيـد = النشامـا عشّـهـا يـابـوك والا غـدّهـا
من سلايل عزوة الطـالات والمجـد التليـد = يـوم صكـات الليالـي محتميـةٍ حـدّهـا
حلمها وزن الجبـال اللـي وتدهـا مايميـد = جهلها كانه حضـر محـدٍ يوقـف ضدّهـا
لاعتلوا قبّ المهار وجالهـا منهـم طريـد = هجمةٍ ماهـوب سهـل إن الدفـاع يصدّهـا
حسبة الخيـال منهـم عـن ثلاثميـة عقيـد = لاتنـادوا جــارك الله قــوةٍ مااشـدّهـا
السلاح من الحديد وعزمهـم مثـل الحديـد = والمنايـا صفـوة المـاء وارديـنٍ عِـدّهـا
قلتها وانا من اللي فـي المواقـف مانحيـد = لابـةٍ تطـرب فعايلهـا ويغـنـي مـدّهـا
من سبيع اهل عطايا الله واهل خضر الجريد = طمعةٍ للنـاس واختصـت بهـا مـن بِدّهـا
عزوة الميقاف واهل المجد والسّاس الجويـد = جيت منّـا خالهـا وان جيـت منّـا جدّهـا
[/POEM]