أخبار بسيطه من هنا ومن هونيك





يقولّك أنجـوس إستبعد الرباعي محمد الشلهوب والمنتشري وصاحب صاحبه وصالح بشير الشلهوب يقولون انه مصاب وان طبيب الهلال لعب فيه يوم اعتمد على الإبر المسكنه وترك اللاعب يلعب مع الهلال من مباراة باختاكور الأوزبكي ويشهد الله اني قلتها من ذيك الأيام قلت مانبي نخسر الشلهوب والقحطاني وجات سليمه مع ابو قحط ولا مشت مع الشلهوب مير عسى العوض في مقبلات الليالي <- قلبها مراجل :d

مير الي زاد الطين بله انه يقول انه أبعد حمد المنتشري لأن حمودي عنده ثلاث كروت من أيام التصفيات يعني ماراح يلعب مباراة كوريا نعنبو بليسك يالكمخه يعني مافيه في الدوره الا مباراة كوريا ؟؟ الشرهه مهيب عليك الشرهه والله على إدارة المنتخب الي تضحك عليهم تقول ذا عصير تفاح وتفلها آخر الليل تقوم مخمّره في بطنك وتجي بقرارات مدري وش تبي .


......................







حارس المنتخب الاولمبي والأول والمشارك في كأس اسيا وليد عبدالله توفت بنته في الرياض وعمرها شهر الله يرحمه ويجعلها من عصافير الجنه

..............................




.............................





الحكام المشاركين في كاس اسيا من السعوديه

خليل جلال الغامدي ( ساحه )

محمد حمد الغامدي ( مساعد حكم )



......................








اليوم بيبـدا مرزوق العتيبي يطقطق في التدريبات مع النصر الي حضروها تقريبا جميع اللاعبين ماعدا لاعبين المنتخب الثلاثه ورجع للتدريبات حمد الصقور الي غاب بسبب وفاة جده الله يرحمه وابراهيم الشهري واحمد الخير وطلال الشهري اما المحترف التونسي المرداسي ( شكله من اهل رنيه والله بلا تونس بلا بطيخ :d ) وصل البارح الساعه 12 تقريبا واليوم بيحددون وقت للمؤتمر الصحفي

البزقه التون سوو معه الرياضيه لقاء ويقول ان شاء الله ان بصير ازين من دينلسون واني يوم طلعت من ستيوا بوخارست طلعت لان رئيس النادي تهاوش مع الربع والداعمين الي يقولون انت نصاب جايب لنا قزم يلعب معنا وهذا الي خلّى الرئيس يعصب وينزل بشته على المكتب ويمشي ومدرّب الهلال الحالي سوّى موقف يذكرني بمواقف شالح بن هدلان وشليويح العطاوي والرياجيل الطحاطيح الي قبل يوم استقال الرئيس ورفضو اني العب قال منيب قاعد في ناديكم ولا دقيقه يا الجحلط وروحو دوّرو لكم لاعبين مصارعه يلعبون لكم ومادام الرئيس نزل بشته هذا بشتي بلوه واشربو مويته انا بروح الهلال .

الزبده ان اللاعب يقول الدوري السعودي يعتمد على المهاره والسرعه مهوب مثل الروماني الي يبون ثيران واجسام ما يبون مهاره عشان كذا الدوري السعودي بيساعدني خصوصا اني قد انضميت لمنتخب البرازيل للناشئين الي جبنا كاسها مع باكيتا بالرغم من اني ماشاركت اساسي ابد


....................




كندينيو رجع للإتحاد ووصل البارح للمطار ويقول والعهده عليه انه يوم رجع شرط على منصور البلوي ان اللاعبين يكونون يبونه يرجع يدربهم والا مهوب جاي فالبلوي صرف له وقال شاورتهم وقالو لي من شاور ما عطى يا ابو حمدان هات الرجال والامور طيبه ان شاء الله مع اني اشك ان منصور البلوي يقدر يتفاهم من بعض اللاعبين بدون مترجم هههههههههههه


.......................





بوكير جا هو وزوجته مدري توأمه الزبده انها انه جا وهو وحرمه تشبه له ويقولك انا لا مبسوط ولا زعلان على رحيل كايو لاني من زمان أقول انه مفروض يطوّر نفسه ويترك عنه الشراب مهوب عاقل وريث باريس هيلتون






ويقولك بعد إن مسؤول الاحتراف الاهلاوي غرم الله العمري ( الله يهبها في وجهه ) صرّح ان صالح السلومي عرض عليهم لاعب الهلال السابق رودريقو بـ (250 الف دولار ) وأنـهم اذا شاورو بوكير بيقولون للسلومي وش بيسوون



.............................................








الحزم رفض الانضمام لدورة art في تونس بالرغم من إنه بيكون هناك في ذيك الفتره بس رئيس النادي علي العايد رفض وفقا لخطط عمليه مدروسه برضو انه يشاركون ووافق وفق خطط علميه مدروسه ثانيه انهم يضمون ناصر الحلوي من الفيصلي وبندر تميم من النصر وحسن حريصي من الخليج ووليد الجيزاني من الأهلي وانا أقول ما جمّع الا وفـّق .

ومن جهه ثانيه عطو موافقه نهائيه للاعب الاتحاد السابق حمد ابو ربع ا نه ينتقل للوطني الموسم القادم لانه لقى وظيفه هنا ثابته تستلزم وجوده ومن باب التقدير وافقو على انتقاله للوطني عشان يتدرب ويلعب مع الفريق ويداوم .



نمر على الأخبار الطريفه




يقولك ان فيه شركه اتفقت مع الاتحاد السعودي على تجميع روابط الأنديه ونقلهم الى اندونيسيا ليعكسو واجهة التشجيع السعوديه الي الظاهر تاليتها بيجي بزر شايل علم الهلال وطاب في نص الملعب ومعه لوحة يا روحي يا سامي انت احلى الاسامي ومن زود الذهانه اختارو صالح القرني وعاطي الموركي وصالح الدوسري ( الصرناي ) .. بالعربي في مباريات المنتخب فيه اثنين حجز وواحد شرقاوي بتطلع رابطة المنتخب تقول مدرجات الهند كل مشجع يتكلم بلهجه


.............................



فيه مشجع مطفّي النور اتصل على برنامج رياضي يحلل لكأس اسيا ومن زود الذهانه راهن هالمشجع ان الكاس للأخضر وان سامي الجابر هو الي بيجيب هداف كاس اسيا وانه هو الي بياخذ اللقب وانه هو اللاعب الي يستاهل انه يرفع كاس اسيا وبيسويها مع المنتخب فالمذيعين الي كانو يسمعون المكالمه فققعو ضحك على كلامه وقالو ان سامي معتزل دوليا له سنه والى الان يشاور الخيره هل يعتزل الهلال السنه ذي والا يصبر لين يعتزل الدنيا مره وحده وهو لاعب هلالي الزبده ان هالمتصل انحشر وقفل المكالمه ( لومناحي جواله مهوب استقبال كان حلفت انه هو الي متصل :d )



مباريات تستاهل المتابعه اليوم

كأس اسيا
تايلند vs العراق

كوبا أمريكا
فنزويلا vs الأورجواي
البرازيلvsتشيلي

كاس العالم للشباب

الأرجنتين vs كوريا الشماليه
التشيكvs بنما
بولندا vsكوريا الجنوبيه
البرازيل vs امريكا


السفاره في العماره

5:30

Art افلام



:d



..........................


مراسلكم

فيصل بن دويحان