الصمت كنز اللي عرف قيمة الصمت
والحكي في بعض المواقف جريمـه
يا من على زلّـة لسانـك تندّمـت
ماعـاد تنفعـك النوايـا السليمـه
لو ترجع الأيـام بـك مـا تكلّمـت
ولا خسرت من الشيَم ربـع شيمـه
سهّرت لك صاحب على صدمته نمت
أحزنتـه وفرّحـت راعِ النميـمـه
لوّ انجرحت ومن جروحـك تألّمـت
ما كنت تطعن صاحبك في صميمـه
عذرك تلعثم وانـت مثلـه تلعثمـت
والعذر قاصـر دون كُبـر الظليمـه
يا صاحبي كانك على العذر عزّمـت
وش عاد لو تمطر على البحر غيمه
جهلت بي وانـا عرفـت وتعلّمـت
والعاقل اللي صار عقلـه خصيمـه
شحيّت بك واليوم عن رفقتك شمت
خَلِّك مع ذكـرى السنيـن القديمـه
وانـا بكـلّ اللـي تعلّمـت سلّمـت
إن الحكي مالـه ولـو طـال قيمـه
وان كانك بغفـران ذنبـك توهّمـت
عندي على حقران مثلـك عزيمـه




الله يابو محمد انها تُنكتب بماء الذهب


دراية بخاتمة زلات السان ومعرفة ما يعقبها من ندم

ونصيحة تُهدا ولا تُباع


تقبل احتراماتي ايها الشهم الناصح المُبين


تلميذك محمد السالم