عبداللطيف الغامدي

مساكم الله بالخير

اليوم طعة ما مثلها

احاول اختصر لكم

معزومين للفطور عند واحد من الربع بعيد شوي ويروحون العيال بالسيارات مافيه غير سياره وحيده

الله الله
ويوم جا العصر وادور المفتاح قلت بنطلع نتمشى شوي لين يقرب الموعد ونروح للرجال

المفتاح ريموت وندور وندور لين مابقي عن الاذان الا شوي وانا القاه
وازهم على رفيقي اللي بيخاويني للرجال .. بشر لقيت المفتاح قلت مالك لوى

لاونه رجال في حاله وصدّاق ماله في المقالب والسوالف النص كم

قلت يارجال انا تذكرت لي شغله يمكن تنفعنا والمفتاح الظاهر اني مقفل عليه في درج السياره

قال الحقنا بالحل

قلت انا شايف لي فلم اجنبي صاير عليهم مثل هالموقف وسوو حركه وانفتحت السياره

قال اسلم وانا ادس المفتاح تحت البوك لا يشوفه

قلت جود الكفر اللي قدام وحاول تسحبه بقوه باتجاهك وانا بدف الكفر الثاني بالاتجاه المعاكس
وان شاء الله تنفتح السياره

قال انت صاحي والا مجنون دق على الرجال وتعذر لنا منه بس

قلت ياخوي منت بخسران شي جرب ونشوف

وهو يجود الكفر الامامي ويسحب ويسحب لين قام يصب عرقه
وانا اسوي اني ادف الكفر الثاني واضغط على الريموت وتنور الانوار وتفتح البيبان وهو يفتح فمه معها

وانقز في السياره اسوي اني فاتح الدرج ومطلع المفتاح منه وهي تمشي عليه الاجودي

المهم ونركب وطول الطريق وهو فاتح فمه ياولد والله انك مصيبه
ليه ما جبت الحل من بدري خليتنا نتمشى شوي

قلت سجيت منه ياخوي خلنا نروح بس نلحق لا يضيق معزبنا

ونوصل خوينا ويرحب فينا ونقلط نفطر الفطور الاول والدهشه ما فارقت وجه عميلي
ههههههههههههههه

ونقعد بعد الصلاه نحتري باقي الفطور قال الرجال العلوم والاخبار

قال خوينا والله اليوم ابو راكان جاب له شي ما عمري تصورته وهو يعلمه
وانا ماسك نفسي من الضحك شبه متلطم ماغير كتوفي تناقز

ويوم خلص القصه وانا ابخها ضحك ونضحك لين ماعاد نقدر على شي
واعلمهم بالقصه وهو يزعل ويخلي المجلس والفطور
ويالله رجع بحبة خشم يكمل فطوره

وتوه زعلان الله يعينني لين ارضيه وسلامتكم