[POEM="font="Simplified Arabic,5,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]يالله ياللي مقامك فوق عرشك مجيد= يا كاتب أرزاق عبدك في مكاتيبها
أما جعلته شقي وألا جعلته سعيد= والآدمي في حياته جاهلٍ غيبها
تجعل لنا من فعول الخير عندك رصيد=في ساعةٍ كل نفسٍ ينكشف عيبها
نتبع هوى النفس ونجيها على ما تريد=ما ندري إنها تخادعنا بالاعيبها
انقول متّع شبابك دام عمرك مديد=واليوم روس الشباب مبيّنٍ شيبها
لا راح ذليوم جا بعده نهار جديد=والناس بتموت ما تمّت مطاليبها
تموت غاياتها لا حشرجت بالوريد=وتعيش مادامت الأقدام تمشيبها
درس الليالي تعلم منه حتى البليد=والناجح اللي كفاه الله مخاليبها
ما بين حظٍ رديّ وبين راسٍ عنيد=تعبت نفوس الرجال وخاب تطبيبها
أضّمد جروح وقتي بالرجا يا سعيد= ومكبّرٍ هقوتي باللي بلاني بها
وأنا على النية العليا وشوري سديد= وأمد يمناي لا مديت واعطيبها
ويا هاجس الشعر عطني من سمان القصيد= أنا هواي السمينه وأنت تحريبها
لي هقوة فيك لا زادت ظروفي تزيد=بين الرجال الزحول أفخر وأماريبها
لله در النشيد اللي على اسمه نشيد=اللي بيوته تهولّك بتعاجيبها
أمثال شعر القعيمه والزلامي رشيد=ابياتهم كل ما مرت فرق طيبها
هل منهجٍ في الجزالة ثابتٍ مايحيد= لاما تحاكوبها كلٍ يغنيبها
الشاهد امن الكلام إن القصيد الفريد= سلعة ولا كل شاعر يقدر يجيبها
وختامها يالله الغفران يوم الوعيد= في ساعة كل نفسٍ ينكشف عيبها[/POEM]