السلام عليكم

اسعد الله جميع اوقاتكم
اليكم هذه المتواضعه وعسى ان توفّق في نيل الرضا منكم





[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
يالله جعل الخيال اللي مزونه زبر=برقه يزيل التعب والحزن والاكتأب
اوايله كنّها ترسل قنوفه سبر=مبشّره بالطمع في مقدمه والعقَاب
معه الرياح اللواقح تدفعه من دبر=وانفكّ لمريّضات المزن من قدم باب
وامسى يدرّج كما عودٍ لحقه الكبر=في ليلةٍ بدرها غايب يدوّر زهاب
تفرح به الارض عقب انّ الزمان الغبر=ركّب عليها الدهور , وشان وجه التراب
واليا زما السيل والعساس جاب الخبر=قرمٍ , تفرّق على سبلاه شيب الشباب
وكّد وركّد علومٍ للخواطر جبر=تبهج صدورٍ نصبها زاد فوق النصاب
يازين تلّ العشاير ناحراتٍ حبر=مرتع ومدهال سمحات الخدود العِراب
سودٍ عراض الجنوب معكرشات الوبر=لافرق من روس اذانيهن وروس الحراب
مايشبعنّ الطيور معالفات الهبر=في مايمتّعهن الله من طوال الرقاب
ارقابهن معطيتهن عنفوان وكبر=ماكان اسميّهن الا , ناطحات السحاب
الوحّده جنبها مادون ثامن شبر=سفينةٍ قنّعت سود الغراير ثياب
زود السنام ارتكتله بالفقار الجبر=من كثر ماهوب فاهق للظّهر بانسياب
ماللنظّر دونها صدّه ولا ينصبر=عنها , وهي مع هواها في ذهاب وأياب
وان وقّفوها على الكبري عشان تعبر=لو انّ قدامها موج البحر ماتهاب
البل , ولله في خلقه شؤون وعبر=آيه وفي خلقها مضرب مثل فالكتاب
يوم انّها فالسنين الماضيه ,, يعتبر=في روسهن روس الاموال ومعزّة جناب
كم سجّلت من ضحاياها شيوخ وجبر=من دونهن دافيات الدّر حلو الشراب
مراجلٍ ماتحاش الا بعزم وصبر=الله يجازي من أكرمها بجزل الثواب
طراتها زال ماحِطّ الفتى فالقبر=طرد الحيا بالبكار العرب جرد الرقاب[/poem]