السلام وعليكم ورحمة الله وبركاته

واسعد الله جميع اوقاتكم بالخير والمسرااات


[poem=font="Simplified Arabic,5,darkblue,bold,normal" bkcolor="white" bkimage="" border="double,5,teal" type=0 line=0 align=center use=ex num="0,black"]
نذ العرق من خد ممهورة الكيس=بريةٍ حر اللهايب وزاها
من كف بخصٍ قاسها بالعدد قيس=ماقصدة انه غالياً مشتراها
لاكن وزنها بصاليات المحاميس=بقياس قدرها على قد ماها
شفقٍ ايمسسها على الجمر تمسيس=بيده عن اركون اللهيب ايحداها
لاما ندس منها ندى الكيف تنديس=نذ العرق من عرقها ورتواها
ويوم اقلبت شقراء شقارٍ بتدهيس=عن صالي الاهب فهقها وراها
لحظات يطرقها براد النسانيس=بالمبرده واقبل يذعذع شذاها
ودنا لها الي تقل مشكاة قسيس=متفرعناً كل الوصايف حواها
ساقاً و عنق ومبهماتاً مقاويس=لا ارخالها المشفي تجاوب أعواها
وحضب لها اللي كنها طير بلقيس=ممشوقتاً من عذب ماها سقاها
تقلب غضب من حر صلو المقابيس=فوق السنى لاما استوى مستواها
ولقم بثنتيناً أوزاها مكانيس=وسط الوجار مسايفات بذراها
صفراً على روس النشاما مراويس=ماغير هيل وزعفراناً اغذاها
لا صخا بها القاصر ولا حافها الهيس=دسع الرجال اللي أكراماً الحاها
فنجالها طب الهواجيس وابليس=يجلى صدى الضيقه ويصحي سماها
لا ساقها الشغموم بين القرانيس=روس الرجال اللي بعيدٍ مداها
بوجيهم هيبه وحشمه وتونيس=وامجاد جودٍ في ثناها تباها
خويهم يحشم ويكرم ابلا قيس=معزته محداً يقرب احماها
ايقدسونه طول الأيام تقديس=لاشينت سود النوايا نباها
ياحلو خوة كاسبين النواميس=قطاعة الفرجه ايلى أوحش خلاها
لا صبحو دواً أفجوجه مداريس=من غب مشحاتاً يسري أسراها
قفرٍ بجاله للوناسه مراميس=يجلى عن النفس الغثيثه غثاها
وبدري سقته الساريات المراويس=غراً يروي يابس القاع ماها
دهماً هللهن لون دق النواقيس=وقش البرد من فوق صافي صفاها
ومن سيلته ماجاه حتى العواسيس=خلواً صحاصيحه يظيق فضاها
روضن بهو نوار ورده مكابيس=غير الندى من نبتها ما وساها
واجوال برقٍ لون روس الطواويس=متبيجحاتاً من خلاها بفلاها
مع طاعة اللي له عباده مناكيس=حياً خفايا الروح يعلم خفاها
له لذةٍ ماتنحسب بالمقاييس=في خاطري تازن ثقل ماسواها
تسوى حيات الرابحين المفاليس=قومٍ غرام المال بيح عزاها
في ذمتي لو جربوها الهداريس=الروجه اللي ماتفارق انساها
عقب المقام أن يتعبون العراميس=وبالدار ماتدبل اكبود أقصراها
لاكن طبايع والسجايا مجانيس=بين البشر والنفس تتبع رضاها
حتى الليالي مشفقات ومداميس=ولا دانت الدنيا لحياً بغاها
العمر واحد والنوايا متاريس=وروح العزيز الموت يرخص غلاها
يرمون عن جسمه جداد ألملابيس=ويطوى بمثاني خامتاً ما اكتساها
دنيا اعبرها تدرس العقل تدريس=المسعد اللي باعها ماشراها
هم وغرابيل وعذاب وكوابيس=ولا عمرها حدت على من بكاها
يامن عواقب خاتمتها الطواسيس=قوماً مع الغفله هواها شعاها
يالله يامخلي سبيل المحابيس=يارب نفسي لاتخيب رجاها
عفوك نهارٍ ييبس الريق تيبيس=هوله يهول المرضعه عن ضناها
وصلاة ربي عد برد النسانيس=وعد الجبال وما حوت من حصاها
وعداد ما خط القلم بالقراطيس=على نبيك خاتم الرسل طاها[/poem]