منتديات المرقاب الأدبية - عرض مشاركة واحدة

27-03-2008, 03:00 PM

أبدا بذكر المبـدئ اللـي منـه وإليـه المسـاق
خلاّق خلقه من عدم ياليـن صـار الهـم وجـود
علاّم ماتخفي صدور الخلق مـن صـدق ونفـاق
ولايــزوّده الـوفـاء ولا ينقّـصـه الجـحـود
له ملك الأرض مع البحور مع السموات الطبـاق
ومـا حـواه الكـون كلـه والبوايـن والسـدود
ومن بعدها مادام حنّـا مـع زمنّـا فـي سبـاق
نويت أسجّ الفكـر ليـن القـاف أعديـه الحـدود
وأبا أسري بليـل البـدر قـدّام لايصبـح محـاق
لاصار قافي مسندي من حقي أرقـى بـه سنـود
بيني وبينه مـن قديـم الوقـت موثـق واتفـاق
والحمد لله ماعـرف مـن بيننـا نقـض العهـود
صدره وعجزه مايخيّبنـي لامـن الصـدر ضـاق
إمّا صرف لي من ذهب وألاّ صرف لي من نقـود!
وأقرب مثل قافي هذاه اللي علـى هـذا السيـاق
من قلب وألاّ من لسان أجود بـه وهـوه يجـود
وأنا ليـا لدّيـت عينـي شفـت شـئٍ مايطـاق
مشاهدٍ تدمـي القلـوب وتنفطـر منهـا الكبـود
مانيب مستغرب ليـا مـن قالـوا الخـوّان بـاق
أستغرب لياقالـوا الصـادق تـرى مافيـه فـود
أوضّح أكثر ؟ كم عددنا اليـوم بخـلاف ووفـاق؟
ولانفعنـا حـوزة الاسـلام لـو إنــه بـعـود
لاعلـم لاتقـوى ولاقلـبٍ لنصـر الديـن تـاق
زادت بدعنـا بالعـدد والشـرك جافينـا بــزود
تلقـى حدانـا لاحلـف مايحلـف الا بالـطـلاق
ليا متى حنـا علـى زلـه عـن المِلـه رقـود
هل فيه للغفلـه هاذيـه ياجماعـه مـن فـواق
جيش العرب جاه التحشّد والكفر جوا لـه حشـود
بعد لحقت المسجـد الأقصـى لـك الله يالعـراق
حـنّـا تجنّـدنـا ولـكـن لاتسمّيـنـا جـنـود
وياوجد حالي عنتس ياغزه بعـد رحتـي حـراق
جزاء صمودتس حاصروتس أبنا خنازيـر وقـرود
إشكَيْ على الله مير لـو الـراس مليـانٍ فـلاق
مالتس عضود إن تسان حطيتي بعضنا لتس عضود
هذاك وقتٍ راح يـوم الخيـل مـع حيـد النيـاق
واليوم حتى الهـرج مـدري نطلعـه وألاّ يكـود
خيّم علانا الصمت والمنطق خرج بـرّى النطـاق
راحت مهابتنا وطـي بيـن النصـارى واليهـود
لابارك الله فيـك مابـك خيـر يالسلـك الدقـاق
يوم اجتهدنا لجـل ناثـق فيـك ضيّعـت الجهـود
ولامسكنـا منـك ياكـود التنـازع والشـقـاق
نفّد بعضنا البعض الآخـر والسبـب حفنـة نفـود
ماباقي ألاّ الصبـر لـو إن الصبـر مـر المـذاق
ونردّد القول الشهير وجملة ( سهـود ومهـود )
الله على علمٍ ليـا جـاء ينتشـر عبـر الآفـاق
مضمونه إن المسلمين أحيـوا مواريـث الجـدود

ياسلام ياسلام

يامطوعنا

شاعريه من الطراز النادر

وقصيده سلسله ولايعلى عليها

دمت مبدع ونجم مرقابي نفتخر بوجوده بيننا

صح لسانك