بويتات لا تصل لمستوى مناسبتها !

[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
راكب اللي لامشى ماحدٍ زيـّه=لاهو أمريكي ولاهو بياباني
وسمه رقومً على خد شاصيـّه = ونقشة الأرقام وسم البريطاني
إنقليزي والعقول إنقليزيـّه = أنهبل منه السويدي والألماني
صممه زنديق وأمه يهوديّه = وخاله إبلا دين وأبوه نصراني
وصنعه ممسوح وأمه مسيحيّه= جده القسّيس وآبوه علماني
ورغم مابه من خلافات دينيّه = في المصانع يختفي فرق الأدياني
تصبح الغايه علامه تجاريّه= تقتل الفكسار وجيوب نيساني
وأنتجو راعي الوصوف الخياليّه = مركب الحكام في كل الأوطاني
رنجروفر قمة التكنلوجيّه = إنسيابي في رفارف وبيباني
كن حبكة داخليـّه وبوديــّه = قاف من حبكة عناد الحويماني !
وكن دقة سلفه ألفاظ عبريّه= ترجمتها وين الاول من الثاني
ولو سميره بنت توفيق سوريّه= صوتها بمسجل الرنج لبناني
خص لامني فهقت العضيليـّه = وأنشرح بالي وأنا أكوسرألحاني
مايوقفني ثمانين دوريّه = دام إبن حجنه تقــدّم وناداني
من هواجيس الضمير الحقيقيّه = ياسلام الله على طيور حوراني
دعوة الغالين ماهي بمنسيّه = كيف والداعي أعده من أخواني
صاحبي فيحان ياحي طاريّه = من هل الطالات ذربين الأيماني
نسل إبن رايق نفيع ومجانيـّه = في الحجاز ونجد ديره وشيخاني
أن وردت كلاخ والاّ النخيشيّه = وأن وردت الشط والاّ أم غرباني
مثل مرساله ومثل البجاديّه = بـسْل والحسرج ومحضب وصدعاني
علم آلاد نفيع بانت مواريـّه = يامواري الطيب في كلّ ميداني
يوم بن حجنه شبيب وعزاويـّه = في لميلح جندلو كل قوماني
ويوم صَوْيه خير شاهد وماريّه = وتشهد سحيله وصبح المحيـّاني
ويشهد مواجه ويوم النضاديّه = وكم وكم غيره صباحات وأكواني
عادة العتبان في ذي وفي ذيّه = شامخينً من قديمات الأزماني
طايلين ونايلين وشقرديّه = صارمين وحازمينً وشجعاني
مسرجين الخيل في ساعة الهيّه = مهلكين الحيل للضيف والعاني
ذبحة الحايل طقوسات يوميّه = ماتوقـّت بالضحا والمسياني
ولطمة العايل سجيه طبيعيّه = بالقنا والرمح والسيف شاماني
محتمين الذود والدار محميّه = ناطحين الكود والعلم نيشاني
آتشرف يوم لي عندهم جيّه = وأحبك القيفان وآفل حجاني
وأنت يافيحان لك عاقد النيّه = عن لزومك ماأعتذر والعمر فاني
من غلاك البيد لرضاك مطويّه = صوبك التقدير والطيب يشعاني
كم وكم زاهم ودعوه وبرقيّه = وأعتذرت فلان وفلان وفلاني
المشاغل كلها اليوم ملغيّه = لادعا فيحان ماني بمتواني
جيت أبارك لك وداع العزوبيّه = وجيت أشاركك الفرح ياكحيلاني
الله إنه يرزقك خير ذريّه = وجعل عمرك في سعاده ومتغاني
ياسليل الجود عون الجلاويّه = كاسب الطولات ومزبن الجاني
سقت لك من ذود الأفكار منقيّه = مثل نقوة ذود غازي العضياني
والوكاد إن البكار العمانيّه = ساقها لك واحد ماهو عماني
لكن سْعودي من أهل السعوديّه = منسبي معروف وإسمي وعنواني
أحمري ومن الديار الجنوبيه = من يدور لي على الطيب يلقاني
صيتنا عالي ونيراننا حيّه =من رجال الحجر واللي نهض باني
الوفا والطيب عادات جديّه = عاش أبوي اللي على الطيب رباني
أمدح العتبان معنى وقافيّه =وأذكر ربوعي وصح الله لساني
دون ظلم ودون نقص ومحقريّه = في القبايل كلهم قاصي وداني
ماهنا تحديد والاّ خصوصيّه = العموم وْنعم حضـرً وبدواني
كلهم وافين ميه على ميّه = طيب عدناني على طيب قحطاني
هاوصلى الله على مرشد التيـّه = النبي الهاشمي نسل عدناني
عد ماقد بانت ومالت الفيّه =وعد ماهب الهوى خضر الأغصاني[/poem]