حي الله اللـي لفانـي يـوم دوّرتـه
ضيفٍ بعد ماانصرم ثلثين من ليلـي
جانـي يبشـر بشوفتكـم وبشرتـه
بالوقفه اللي تنومـس كـل حلحيلـي
وشبيت نـاري وقهويتـه وعطرتـه
بالعود والمستكـا والبـن والهيلـي
وطبيت به روضة افكـاري وخيرتـه
بين الغزايـز صعيبـات المناويلـي
وهمست فاذنه بما اريـده وحذرتـه
قـدام ماابديلـه علومـي ويبديلـي
اما يجـاوز حـدود اللـي تصورتـه
ولا يجنب ولا اتعـب لـه مراسيلـي
وسليت سيفي وكم الثـوب شمرتـه
حان الوعد والوعد مافيـه تاجيلـي
واسهرني الهاجس المطنوخ واسهرته
كن الحميّا من اقصى السيف توميلي
وطلبـت ربـي ووحدتـه وكبرتـه
يجعـل سفرنـا وطرقتنـا تساهيلـي
سار القدم في طلب ربعـي وسيرتـه
اطوي المسافات بالكيلـو وبالميلـي
في لازم الربع كل الصعـب سخرتـه
واعرف ليا وين تاصل بي مواصيلي
انا ليـا طـال مشـواري تقاصرتـه
كن المسافه مـن الفرحـه تغنيلـي
وليا بدا علم عـن ربعـي تصدرتـه
بالشعر والعرف وعلـوم الريجيلـي
وليا حضرنـا وكـلٍ جـاب مقدرتـه
والله ليبطـون ماشربـوا فناجيلـي
نجم ليا نشت راس الضلـع دمرتـه
تبرد بـي كبـود وكبـودٍ مغاليلـي
واللي يهـاذر ماتزعجنـي مهاذرتـه
لو قال انا اللي وانا اللي ما يحاليلـي
تراه حجمـه صغيٍـر لـو تكابرتـه
نثيلةٍ في مسيـل وشالهـا السيلـي
تضحك على لحيتـه نـاسٍ مدبرتـه
يسهي عن الفرض ويصلي التنافيلي
ما يعرف الدرب ميمنتـه وميسرتـه
ولا يعرف المقفيات مـن المقابيلـي
هيكل رجل والثياب البيض ساترتـه
ويعد نفسه مـن عـداد المشاكيلـي
مايدري انه غبي والنـاس خابرتـه
وتعرف عن شخصه ادق التفاصيلـي
والشعر ياسامعين الشعر وش كرتـه
لو مااذكر فعول ربعي ويش يعنيلـي
شعرٍ تناشت بـه الافكـار وامطرتـه
على سموع الحفل مثـل الهماليلـي
سلام يامشيخـة راسـي ومفخرتـه
يالاد عاصـم عطيبيـن المفاعيلـي
في حفل حمدان كل الفكـر حضرتـه
حفلٍ يجمّـل وزاد الحفـل تجميلـي
حضور شيخ فعول الطيـب شاهرتـه
من وقت طلمس وعبدالله وجبريلـي
شيخ ربوعه لوقت الضيق ذاخرتـه
تلقى الذرى غي جنابـه والمقاييلـي
كبيـرٍ اسمـه ووقفاتـه مكبـرتـه
الاصل عاصم وابوه وجـده عقيلـي
وليا نشدت الزمـان القـى بذاكرتـه
صليل سيف وعزاوي وركضت خيلي
مجدٍ بني عمـي عتيبـه مسطرتـه
في صدر الايام يبقى جيل عن جيلـي
كم شيخ قومٍ جـريٍ فـي مغامرتـه
عزمه يذلـل قـوي العـزم تذليلـي
ترامه اليوم نجـد وصبـح نافرتـه
يطلع لها شيخٍ اطيب منـه بالحيلـي
يوم الصناديد فـي نجـد متشابرتـه
ولهم على نجد واطرافـه مداهيلـي
قبايـلٍ تطّحـن والحـرب مسعرتـه
تكتال من بعضهـا وترجّـح الكيلـي
قامت عتيبه وكـل الوضـع غيّرتـه
لطامـة العيّـلا ذبـاحـة الحيـلـي
واللي يبا نجد واللـي فيـه شطّرتـه
بهجف الكراسي وبالحدب المصاقيلي
قوم ليـا حولـت فالجمـع بعثرتـه
وشيوخنا فالدجـى مثـل القناديلـي
لا جا نهارٍ تغطـي شمسـه غبرتـه
للشلـف ملحـم وللبنـدق نواجيلـي
واللي براسه سطـر حنـا دكاترتـه
بعد النشاط يتراجـع فاتـر الحيلـي
وندله اللي ظروف الوقـت قاهرتـه
خوي جنب وقصير وضيف ودخيلـي
حنا رمـوز الفخـر حنـا عباقرتـه
حنا نجوم الجهات الجـدي وسهيلـي
برقا وروق الذي ماصـار صيرتـه
يوم المنازل ويـوم الحـط والشيلـي
ايـام واكـوان والعاقـل محيـرتـه
تضيق فيهـا المخـارج والمداخيلـي
قـدام عبدالعزيـز تـدور دايـرتـه
وتويق شمسه على روس الاقاذيلـي
شيخ حكم نجـد وعتيبـه مناصرتـه
لهم علـى الخيـل تكبيـرٍ وتهليلـي
وابطلب الله فـي عفـوه ومغفرتـه
يغفـر لعبدالعزيـز معـدل الميـلـي
وسلام يامشيخة راسـي ومفخرتـه
ربعي عتيبـه عطيبيـن المفاعيلـي
حي الله اللي مخاشرنـي وخاشرتـه
لاعكـرن المشـارب جـم صافيلـي
صاحب وفاء وان طلبنـي ماتعذرتـه
ماشح فـي مطلبـه لـو فالبرازيلـي
وحنـا مطاليبنـا ماهيـب عاسرتـه
لو نرسله لليهـود افجـع سرائيلـي
ياكم من ليلتـن فـي حـال سامرتـه
واوجزلي الترجمه منهـج وتحليلـي
يطيعني وان نخيتـه جـاب نادرتـه
وعلى وفاء هاجسي مبغـى معاديلـي
اليا بـدأ لازمـي فالـراس وادرتـه
غذ الفكر مـن جزيـلات المباهيلـي
وردت عدن ضوامـي كـل صادرتـه
وشربت من جمته عـذب المناهيلـي
ماني بمن قـوم ناظرنـي وناظرتـه
اللي علـى لحـن ياعينـي وياليلـي
اللي شبابـه هـدر دنيـاه واخرتـه
وراحت حياته هبا من دون تحصيلـي
اشوش للطيب يوم الطيـب عاشرتـه
والا الردا مانصبـت الـه المحابيلـي
لاشفت راع الـردا قدمـي تحاقرتـه
وطلبت ربي يشيله مـن ورا النيلـي
وان شفت راع الوفاء بالطيب وقرته
واخرست قوم الشمايـت والعواذيلـي
ويوم الشعر حان والاحساس فجرتـه
وبانت بعينـي جزيـلات التماثيلـي
دنيت طرس القلم وادنيـت محبرتـه
وناديت للهاجـس برفـع التكاميلـي
وشديت حيلي وجزل القـاف طورتـه
ليننهـا بينـت لـي كـل تشكيـلـي
واخترت مالاق منها لاقـت اثمرتـه
فريدة النوع تحسب مـن محاصيلـي
انحت صخر والمحيط ان شفته ابحرته
ماهاب طول المسافه يـوم تطريلـي
كلـه لجـل شاعـراً معنـاه فسرتـه
ثم شاش راسي على جر المواويلـي
لابداع شامخ وحانت لـي مناورتـه
وسقـت القوافـي وبالله التواكيلـي
بطرقاً مشابه لطرقـه يـوم باشرتـه
لين القوافي نحـت يمـي جواديلـي
القافيـه محدثـه والقصـد كـررتـه
وقامت تلافى على فكـري محاميلـي
ماكنها غير شيـك ان قمـت جيرتـه
ماينقصه غيـر توقيعـي وتسجيلـي
كله على شـان مضمونـن تخيرتـه
بالعين شوفه صفا من دون دربيلـي
مجدن خلد بالفكـر ماظـن غادرتـه
سيفاً مع الرمح واخيـولاً مصاهيلـي
هذا وانا من لهـم بالجـود بادرتـه
الاد شيبـان فـي حلـن وترحيلـي
فهود(ن) مغذاه جنـح الليـل نورتـه
عدوهـم يونـس بطرفـه سماليلـي
لادق وقـت الخطـر للكـل صافرتـه
ربعي بوقت اللـزوم الهـم منازيلـي
ربعي عتيبه قـرار المجـد سمرتـه
في صدر الايـام بعـزوم الحلاحيلـي
انجـاز واعجـاز والايـام فاكـرتـه
مايدخل الشـك فيـه ولا الدهاويلـي
يوم المنـازع تـرى حنـا جبابرتـه
للخصم معنـا حياتـه فـي غرابيلـي
كم طامعاً فـي فقـارة نجـد حدرتـه
حقايقـه ماتحـرف مثـل الانجيلـي
وكم شيخ قوماً لفى لحتفه ومقبرتـه
وامسى بلحد الجلد وسـط الغراميلـي
وكم فارساً قدمنـا والقـدره اعثرتـه
لوكان عزمه شديـد وفعلـه امهيلـي
وفالسلم حنا من النخـوه معاصرتـه
تنسج بنا امثـال واخيـار الاقاويلـي
في حكم من قوتـه للعالـم اظهرتـه
بـأرادة منـزل الـقـران تنزيـلـي
اللي بشبه الجزيزه ظلـت اشجرتـه
وخلا القبايل تحـت حكمـه مظاليلـي
وحد بحدب(ن) صليب العظم باترتـه
وقدح الفسايل من افواه المشاعيلـي
ياكم فصيحن نشب هرجـه بحنجرتـه
لوكان سلطة لسانه تصخـر القيلـي
عوداً حكمها وقـدرة ربـي انصرتـه
عزايمـه تشبـه اطيـور الابابيلـي
في هزم الاشرم بعد بانـت مجاهرتـه
بالمعصيـه واللجـو لقـوة الفيلـي
واسلومنا كل فعلـن زيـن حاصرتـه
للخصم علقـم وللصاحـب معاسيلـي
للجـار حقـاً علينـا فـي موازتـه
من اصغر عتيبي ليا حـد الكواهيلـي
من دون حق القصير ابليس داحرتـه
حقـه يجـي كامـلاً مافيـه تقليلـي
ماضاع اله حق والهيـلا مقاصرتـه
وابليس ملعـون وايدينـه مكابيلـي
وللضيف حشمه وطيباً وسط مجمرته
بعد الشحم واحتسى بـن المعاميلـي
ولدخيلنا مزبنن فـي حفـظ واترتـه
لامن بدالـه مـن ايامـه تهاويلـي
بصدورنا مزبنـه وانشيـل عاثرتـه
لوكان حـوم المنايـا لـه جناديلـي
واللي هموم الزمـان بحـال كدرتـه
يلقى السعـد والاناسـه والتعاليلـي
عند القبايـل وكلـن دون حاضرتـه
الطيـب مايملـك بصـك وتواكيلـي
وهذا كتابي بـه المضمـون حررتـه
خواطرن نظمهـا مثـل السلاسيلـي
للنشر معدودت(ن) واخطابها اشرتـه
اخراج فكري ومن نظمـي وترتيلـي
حقًا لا إله إلا الله
القصيدة الأولى والثانية المجاراة جزلاتٍ من روسٍ جزلة..
وكل بيت من الـ((98)) يسد عن ملايين الملايين من القصايد..
كفو والله كفو.. وبيّض وجيهكم جميع.. وصحت ألسنتكم..
أما عتيبة الهيلا خابرينهم وخابرين طيبهم..
والله ومليااااااار نعم ولا تكفي..
سجّل إعجابي ومتابعتي لكل ما يخطه قلمك..
تحياتي..
|