السلام عليكم



أليكم هذه القصيده عساها تجوز ..
وقد تم ايضاح بعض مواضيعها وهي ماتدور حول كلمة نعم
حيث ان الشاعر الكبير/رشيد الزلامي سبق وأن تطرّق لهذا الموضوع وأعطاه حقه من الابداع

وقلت :
قد قالها في القاف دكتور الأمثال=رشيد جزل الشعر شيخ العوالي


وهذه قصيدتي..

[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
تمرّني بعض الهيوج وغثاء البال=مَرّ الرياح بسايبات الرمالي
وصدّيت عن بعض الشوارب ليا طال=وذلّيت لو اللي نصاني عْزالي
وأصبر عليها عوج لو قالوا الذالّ=قلت أكتبوها ذل وألاّ هبالي
اليوم كلٍ يعطي الخوف جمّال=لو قيل جاوب مايرد السوالي
مغيّر الأحوال من حال لا حال=الحرّ يسكت والقماري تلالي
لا شك أهدّي هاجسي كل ماجال=والقاف أغنّي به ليا ضاق بالي
ياللي تقول النعم في جمع الأموال=وش لون تحكي بالغلط ماتبالي
واعزّتي للنعم من بعض الأشكال=ناسٍ تبيع برخص والسوق غالي
ماهوب يطلق له على كل رجال=صعيب مايهدا لعالي ودالي
قد قالها في القاف دكتور الأمثال=رشيد جزل الشعر شيخ العوالي
أرخصت سوق النعم ياطيّب الفال=بالسوم الأدنى للزبون الموالي
يستاهله من يركع الليل ويسال=رجاء وخوفٍ من عزيز الجلالي
يرفع يديه لخالقه بالتسوّال=ولا يقطع الشارع جنوب وشمالي
لا حالقٍ دقنه ولاهوب سبّال=رجال لاقالوا مثالي .. مثالي
يموت مادوّر عن الدرب محوال=على طريق مكرّمين السبالي
أبوه وأجداده والأعمام والخال=وارث لوارث في مديح الفعالي
أهل البناء اللي بنيهم عز الأجيال=بني الرجال مورّثٍ للرجالي
كرم ودين وعرف وعلومٍ جزال=وإن جات ماقالوا للأعمار تالي
عرّاف عيّاتٍ وعقّال جهّال=وأصحاب ميز ورايهم مايحالي
روس الرجال اللي تنافس في الأعمال=مايحسبون الفانيه راس مالي
درب الشرف لو نالهم معه غربال=موتٍ بعز ولا حياة الهزالي
الرجل مايسمع هل القيل والقال=وفلان قالوا فيه وفلان قالي
يطلع بدربيله على عالي الجال=لين يتبيّن في الطوال العوالي
والكذب عيب ونقص في كل الأحوال=ماهوب ينفع قاصرين الحبالي
ماكل من قال أتعب الخيل خيّال=ولا كل من قال أقدر الحمل شالي
والطيب ذكره مثل أبو زيد بهلال=طاريه مثل سهيل لا أصبح يلالي
وصلوا على المختار ماهل همّال=واعداد ماحن الرعد في الخيالي[/poem]